NSSATA-i sorkar den tenangzüktep agiba sülen lungkak aitba anena atar

Kohima, Aami (June) 12 (TYO): Nagaland Sarva Shiksha Abhiyan Teachers Association (NSSATA)-i ita ka dak tema lungkak aityonga aruba sülen tanü tenangzüktep ka agir lungkak aitba anena atatsü telemtetba agiogo.
NSSATA-i May 2, 2018 anogo nung takhangba agüja lungkak aittsü tenzük aser tanü nungi lumia lungkak aittsü tenzüker lia tenangzüktep agi.
Tanü Naga Students’ Federation aser Eastern Naga Students’ Federation-i tesayurtem den ajurutep aser parnokisa Civil Secretariat nung department ketdangsertem den senden amen.
Anogo piyong senden amenba sülen tanü nikongtsütsü NSF aser ENSF ketdangpurtem lia NSSATA aser school education department tsüngda tenangzüktep ka renem.
Iba tenangzüktep nung Principal Secretary to the state government Menukhol John, NSSATA tir Penthungo Y Yanthan, NSF tir Kesosul Christopher Ltu aser ENSF tatong tir Manpang Wangyen nungertemi sign asü.
Tenangzüktep agiba nung state NPS cadre den kasa NSSATA indang 2010 and 2013 batch tesayurtem nem 7th ROP itasen agütsütsü aser July 12, 2018 nikongtsütsü 2:30 ako nung principal secretary indang chamber nung maparen meyipa reprangshitsü lemtet.
NSSATA-isa documentation nung department den yariteptsü lemtet.
July 12 nü mezüngbuba review senden nung NSF, ENSF aser NSSATA central executive & district representatives adentsü aser iba tebilemtsü mokoktet tashi sendenji menyonga aotsü lemtet.
2010 & 2013 batch SSA tesayurtem indang appointment order, RTI report, advertisements aser tanga kulikakettem nung aibelen aliba department-i metongshitsü atema tenangzüktep agi.
Department-isa mezüngbuba review senden mamendang cabinet den onük ajak lemsateptsü atema tanü telemtetba agi.
2010 & 2013 batch indang SSA tesayurtem shimba memetongshi tashi PGT conversion magütsütsü atema telemtetba agi.
Tenangzüktep agiba nungsa school education department-i mapang shitak nung itasen agütsütsü aser seniority list adoktsü atema mapa inyaktsü shia lir.
Tanü tenangzüktep agiba nung ajemdaker lungkak aitba anena atatsü lemtet.