NStCB Tuensang Branch nung ATM Booth saya

Dimapur, October 17 (TYO) : Tuensang Additional Deputy Commissioner, Nchumbemo Odyuo-i October 14, 2016 nü Nagaland State Cooperative Bank Ltd Tuensang Branch nung ATM Booth lapoktsü.
NStCB Tuensang Branch-i Customer Service tajungba akümba aser tanga bank tem den liromedema technology tsütsü renlokba atema Nchumbemo Odyuo-i tenüngsang agütsü.
Tuensang nung alirtem aser ano Naga nunger asoshi bank temi mapa nendaka mapa inyakba atema Nchumbemo-isa tenüngsang agütsü.
Paisa, Tuensang nung alirtem dang bank nungi teyari agitsü aser mapang shitak nung sen meyipa agütsütsü atema ayongzük.
Sentong nung Board of Director, Tuensang District, S. Yemba Chang-i o tatsüka jembidang, Bank nung Chairman aser Management-i Tuensang district nung alirtem asoshi bilemja ATM Booth amenoktsüba atema pelaba metetdaktsü.
Sentong nung mendenji Managing Director, NStCB Ltd, Imtilemba Longkumer liasü, H. Sangkap Pastor, TTBC-i temoatsü meshia sarasadem aser Lese Luho, Asstt. Branch Manager, NStCB Ltd. Tuensang Branch-i anküp tepela o jembi.