NSWW-i Ato Kilonser, N. Kitovi Jimomi den sensaksemba mapang agi

GPRN/NSCN Council headquarters, Khehoi nung Ato Kilonser, N. Kitovi Jimomi-i  pa den sensaksemertem den külemi agiba noksa ka angur.

Dimapur, March 14 (TYO) : March 14, 2016 nü National Socialist Council of Nagaland (NSWW), NSCN-i council headquarters, Khehoi nung Ato Kilonser, N. Kitovi Jimomi den sensaksemba mapang ka agia liasü, ta Ministry of Information & Publicity, GPRN/NSCN sangdong ka nung metetdaktsü.
Iba mapang Ato Kilonser-i Naga nüjiso inyakyim tenzükba nungi tanü tensa indang osang metetdaktsü.
N. Kitovi Jimomi-isa tetsürtem dang saksalema alitsü, taremzük aser ajemalu yimyatem alitsü ayongzük.
Linük yangerba nung tetsürtemi tongti shilem agir aser takok angur tebur ka sülen tetsür ka alir süra, tamakok angur tebur ka sülen tetsür tamajung ka alitsü, ta paisa shisem.
Jimomi-isa tesentepertem dang parnok yimjung yangluba tetsür asü taochi maliba tetsür’ar shisadangtsü ayongzük.
Ato Kilonser-isa tetsürtem dang noklang nung shilem 33 wazüka yuja lir aser GPRN/NSCN-i tetsürtem tebur den jenjang kasa nung züngshitsü ta nangzük.
Iba sentong nungsa Envoy to Collective leadership, Alezo Venuh aser Home Kilonser, Seochung Sangtam nati tesentepertem ayongzüka jembi.
Iba sentong nung mendenji NSWW Chairperson, Mrs. Holitoli Aye liasü aser tetsür 500 shi aden, ta sangdong nungsa metetdaktsü.