NTA-i Taekwondo championships nung takok angur nem tetushi agütsür

Kohima, September 15 (TYO): Nagaland Taekwondo Association (NTA)-i tawa Hyderabad kübok Telangana nung ayongba 33 buba National Sub-Junior Taekwondo Championships nung medal agizüker 2 – Neikhozo Napranotsu aser Tenloi Phom na nem tetushi agütsüba sentong ka yashi Hombar nü Kohima kübok Indira Gandhi Stadium nung ayonga agiogo.

Neikhozo o Tenloi na nem kulikaket, medal aser senpet sen agütsüba sülen NTA Controller, Pele Khezhie-i NTA talisa, Neikhozo o Tenloi nati Nagaland nem konang nungsang bener arutsüba atema pelaba olen ka metetdaktsü.

“Taekwondo asayartemi State dang masü saka India jenjang nung shilem agia tarutsü mapang nunga takokba ngua konang nungsang bener arutsü ajungshir. Ano, asayar shiai pei taküm tazüokba nung lia tetoktepba ajunga nung yimya tajungba benshia shilem agitsüla,” ta pai ajungshia ashi.

NTA asayartem anir national jenjang nung ayongba tetoktepba nung medal agizüktsüsa tongti shilem agiba atema NTA Team Manager, Theja Keretsu; Team Coach, Visabeiu Peseyie aser Asst. Team Coach, Albert Lotha nunger danga pelaba olen ka pai metetdaktsü.

Neikhozo-i Uttarakhand, Chattisgarh, Madhya Pradesh, Uttar Pradesh aser Puducherry nungi asayartem madak takok ngua tebur temang touzük seret 27 taret shilem indang gold medal agizük aser Tenloi-ia Chandigarh, Chattisgarh, Telengana aser Uttarkahnd nunger nungi asayar madak takok ngua temang touzük seret 21 ser tekübok taret shilem indang final asayatsü jenjang angu saka pai Haryana asayar madak takok monguteti silver medal ang agizüka liasü.

NTA ya Nagaland Olympics Association (NOA) aser Department of Youth Resources & Sports (DYRS), Nagaland na nung züngsemba telok ka lir.