NTAC-i TR Zeliang nem anogo asemnü züngzüktsür

Kohima, February 7 (TYO): Mongulbarnü NTAC-i Chief Minister TR Zeliang menden nungi alutsü atema anogo asemnü züngzüktsüogo aser February 8, 2017 nü chief minister-i ayongzükba senden nung NTAC madentsü telemtetba agiogo.
Chief minister-i ayongba senden nung NTAC lennirtem shinga madentsü aser shirnok dendir parnokji Naga nunger anemertem ta züngshitsü ta parnokisa tetuyuba agütsüogo.
Mongulbarnü TR Zeliang-i chief minister menden nungi malutsü ta metetdaktsüogo aser iba atema NTAC-i ashiba agi, “TR Zeliang-i tekong meranga menden metoktsür aser pai maneni Tribal hohotem aser public mezüngmeshir.”
TR Zeliang-i nübortem anema Army jaoka Flag March agidaktsü, saka iba ya temenünütsüka lir. Kechiyong nübortem taküm lendongbang nung alidangang Flag March alir, ta NTAC-isa metetdaktsüogo.
NTAC-i, February 8, 2017 nungi tenzüker anogo asemnü tsüngda TR Zeliang-i chief minister menden toktsütsü aser Linük Temzüng nung Arrla 371 (A) kübok agüja aliba tashitem kümzüka Nagaland Municipal Act, 2001 yanglushiba sülen ang Nagaland nung Urban local bodies (ULB) election agitsü atema tanü senden nung telemtetba agia metetdaktsü.
India Linük Temzüng nung Part IX A nung Nagaland medendaktsütsü atema Cabinet-i telemtetba agia India Prime Minister dangi shidi zülutsü ta asübaji meyoktsüla, kechiyong iba onük atema Nagaland Legislative Assembly dak tashi peria agüja lir, ta NTAC-isa tanü senden nung lemtet.