NTAC-i Zeliangrong Baudi dang langzür

Dimapur, February 18 (TYO) : Nagaland nung aliba Naga nunger kintemi Zeliang ji Naga nunger kin ka lir ta kanga junga meteta lir, kechiyong April 3 1943 nü Nagaland nung Zeliang kin ‘official’ süa agizük. Ajisüaka, Nagaland nung aliba Naga kintemi Zeliangrong kinji memetet, ta Media cell, NTAC Kohima sangdong ka nung metetdaktsüogo.
Mapang shia Zeliangrong Baudi ta ser telok kati Nagaland nung Zeliang kin anema inyaksangshiba angur, ta parnokisa ashi.
February 7, 2017 nü Kohima nung Nagaland nung aliba kin hohotemi telemtetba ka agi aser iba telemtetba anema nokdakba kinji Naga nunger anemer ta züngshitsü ta bangzünga renem ta Zeliangrong Baudi pur dang metetdaktsür, ta NTAC-isa ashi.
JCC aser NTAC nati Naga nunger sobalibaji kanga junga meteta lir aser Zeliangrong Baudi ketdangpurtem Nagaland nung lira, iba onük angajemtsü atema onok den ajuruteptsü jaoker, ta parnokisa sangdong nung metetdaktsü.
JCC-i ULB election thinena atatsü atema takhangba agütsü aser iba amaji Chumukedima nung senden ka nung tenangzükba agitep, saka cabinet-i iba telemtetbaji ashioktsü aser iba jagi nisung asem taküm lalu aser sorkar office aika raksatsüsa tensa ajuru. Iba nungji ajemdaker T.R Zeliang dang tebilemtsü khuret bena chief minister menden nungi alung ta onoki takhangba agütsü aser iba dakji alaka kecha mali. Anungji, Zeliangrong Baudi-i onok dang sayutsüngitsü nüngdak madoker.