NTAC Kohima-i tanü senden nung telemtetba agitsü

Kohima, February 11 (TYO) : Chief Minister T R Zeliang-i menden tokjang ta takhangba agütsüba ama meinyakba atema Nagaland Tribes Action Committee (NTAC) Kohima-i asüng senden ka amentsü ayongzükogo aser iba mapang parnoki Hombar nungi tenzüka mapa inyaka aotsüba indang telemtetba agitsü.
Tetsür nem shilem lemzükja February 1 nü Urban local Bodies elections magidaktsütsü atema NTAC Kohima-i ketdangsüa mapa inyaker aser parnoki TR Zeliang dang tensa raksatsüba atema chief minister menden tokjang ta takhangba agüja anogo asemnü züngzüktsü.
Hokolbar aonung anogo züngzüktsüba tembang aser iba jagi NTAC Kohima-i Kohima nung aliba kin hoho ajak nikongdang 1:00 ako nung APO Hall nung coordination meeting nung adentsü atema sangdong ka nung mepishia metetdaktsüogo.
Nagaland nung nübortemi otsüsütsü süa inyakba mapa nung taruba teinyaktsü lemtettsü atema senden nung kin telok shia nungi teshimtet nübo kabosa yoktsü atema metetdaktsür, ta NTAC Kohima Media Cell sangdong nung shia lir.
Ano külen, NTAC Kohima aser Joint Coordination Committee (JCC) nati, “kodaser TR Zeliang-i MLA temi pa pusema nungiter ta shia aser nübortemi anenang ta ola adokba tashi mangai Chief Minister menden nungi malutsü tekong meranger?” ta asüngdangogo.
“Pai JCC aser Nagaland Baptist Church Council (NBCC) ashioktsüba aser ano Naga nunger lanur taküm asem samaba kodaser amadoker?” ta telok anatisa asüngdang.
Nagaland Legislative Assembly (NLA) nung akhümtsübua aliba MLA tem dak mulungsentsü mali ama bilemer, kechiyong parnokji nübortemi shimba ta parnoki amadokogo aser nisung taküm lalutsüsa aser timtem bener arutsüsa külakoktsür nisung- TR Zeliang ang parnoki pusema nungiter, ta NTAC Kohima & JCC nati metetdaktsü.
“Nübortemi shimba ama aser Linük Temzüng tsüngdang nübortem asoshi inyaktsü ta tenangzükba agi süra, kechiba MLA temi sen o tashi dak dang rangloker nübortem olabo mangashir?,” ta parnokisa asüngdang.
Democratic sorkar ka nung kechi komar ka asü nunga nübortemisa takok angutsü aser teti dangbo nübortem ola nembanga meyutettsü ta tatartemi angatettsü mapang tongja tongogo, ta NTAC Kohima aser JCC natisa ashi.
TR Zeliang-i pa menden metoksü tashi mesüra iba onük asoshi taküm bendanga agütsürtem tanaben shia marudaktsü tashi nübortemi ola anendaktsütsü makok ta NTAC Kohima aser JCC nati nenshia metetdaktsüogo.