NTAC Kohima & JCC-i TR Zeliang anema ‘poster campaign’ tenzüker

Chief Minister TR Zeliang  anema Kohima nung Civil Secretariat aser Assembly Secretariat kima  poster maloka toktsüba noksa nung angur . (February 08, 2017).

Kohima, February 8 (TYO) : Naga kin teloktemi Chief Minister T R Zeliang menden nungi alung ta takhangba agütsüba mapang Nagaland Tribes Action Committee (NTAC) Kohima aser Joint Coordination Committee (JCC) nati tanü T R Zeliang anema poster campaign ka tenzükogo.
ULB elections anema nübortem nokdakba mapa ketdangsüa inyakertem- NTAC Kohima aser JCC nati “TR Zeliang-i menden metoktsü tashi animesüngzüktsü” ta tenangzükba nung ‘poster campaign’ tenzük.
Parnokisa, T R Zeliang ji Arrla 371(A) indang tsükchir ta sangoktsüogo. India Linük Temzüng nung iba arrla ajanga Naga nunger nem temeten balaka agütsür.
NTAC Kohima aser JCC nati tenzükba ‘poster campaign’ nung TR Zeliang ji nübortem ola tepseter ka lir ta shia lir. Parnokisa, “TR Zeliang ket nung azü lir” aser “TR Zeliang ji Naga nunger anemer ka lir” ta tezülubatem nung zülur prokshi.
TR Zeliang-i chief minister menden toktsütsü atema NTAC aser JCC-i tanü nungi tenzüker pa nem anogo asem züngzükja lir.
TR Zeliang-i, tang tensa ajurua aliba ya nisung kari pei ajangzüktsü asaa inyakba ajanga ajuruba lir ta jembiba atema JCC aser NTAC Kohima-i ashiba agi, “nübortemi kanga junga metettsü atema telok mesüra tentet kobai shilem agir’ar metetdakjang.”
“Iba onük menentsütsü atema pai tiyazü nung tai tongoktsür aser iba inyakyim ya pa jenbutsü atema nübortem mashilen anisatsü merangba lir” ta JCC aser NTAC nati metetdaktsüogo.
Pai nübortemi aginüba ama inyakogo ta jembiba atema pai meyipa reprangdanga kuli bushidangangtsü. Iba dak sendakba nung pai tamasa Chief Minister indang menden toktsütsüla, ta JCC aser NTAC Kohima-isa metetdaktsü.
“Assembly nung pa pusemer peria aliba mesüra maliba indang masü saka pai ashioktsüba ajanga lanur taküm ana samaba den nisung aika yirutsü aser iba atema nübortemi pa dang pai tang mena aliba menden yujang ta takhangba agütsür” ta telok anati ashi.
TR Zeliang-i NBCC temepishiba anema inyak aser pai India Linük Temzüng nung Part IX A indang meputepi jembir. Pai ozüng junga memetet mesüra nisung kar nem pa anishidaktsür ama temulung melemi bilemer, ta parnokisa shisem.
TR Zeliang-i anir MLA ajakji Linük Temzüng ajanga masü saka nübortemi shimtetba ta angatettsüla. Pai Linük Temzüng masü saka tamasa Nagaland nung aliba nübortem tsüngdang langzütsütsüla. Pai election nung takok ngunüra, India Linük Temzüng ajanga masü saka nübortem nem shimdaktsütsüla,
Mepishir
Naga nunger temeten atema nübortemi inyakba mapa nung Kohima-i Tribal Hohos, Organisations aser kijatemi pusema aser haihaura kaa yaritepba atema JCC aser NTAC, Kohima-i kanga pelaba metetdaktsür.
Mongulbar, February 7, 2017 nü APO Hall, Kohima nung Coordination Meeting nung bangzünga renemba ama, February 8, 2017 nungi tenzüka anogo asem tsüngda Chief Minister T. R. Zeliang dang menden nungi alung ta mapang züngzüktsüogo; asenok takhangbatem ama telangzüba tajung mangu tashi iba mapa maneni inyaktsü aser nenok ajak dang asenoki tarutsü nung inyaka aotsüba osang mapangtong nung metetdaktsütsü.
Nenoki iba maparen azüla moudaktsüi pusema nungitba atema onoki kanga pelar aser iba maparen ajanga timtem bener arutsüba atema sasaa bilemer.
Media Cell
NTAC, Kohima