NTC aser CNTC teloktemi Rongmei dak aketba ken o akangshir

Dimapur, Sept.29 (TYO): Nagaland government-i Rongmei nunger nem kin ka ama Nagaland nung züngshitsüsa jenjang agütsüba onük nung, Nagaland chief minister-i iba ken o ya ZPO ajanga okadak benoka alinungji sorkari sadema mejembitettsü ta yashi senden ka nung metetdaktsübaji pai iba ken o ya mejembiner asü mesüra nübortem mashileni anitsü merangba mapa ka dang asütsü ta tanü Nagaland Tribes Council (NTC) teloki sangdong ka nung metetdaktsüogo.

ZPO teloki okadak ken o agüja alibaji state sorkari Rongmei nunger nem 2012 küm “indigenous tribe” jenjang agütsüba telemtetba anema masü saka Rongmei nungertem ‘indigenous inhabitant’ jenjang latetba dak sendakba ken o nung dang lir, aser tang High court nungi Rongmei nunger nem  ‘indigenous certificate’ magütsüi atatsü obendang agüja lir, anungji Rongmei nunger nem ‘indigenous tribe’ jenjang agütsüba ken o anema okadak agüja lir ta jembitsü nüngdak madoker ta NTC-isa metetdaktsü.

“Rongmei nunger nem indigenous tribe jenjang agüja aliba telemtetba ya agientsü mesüra magientsüba tashiji okadak masü state government ket nung lir,” ta NTC-isa metetdaktsü.

Kasa onük nung tanü Brehostibar nü Dimapur nung Cenral Nagaland Tribes Council (CNTC) telok senden ka mena Rongmei nunger dak aketba tebilemtsü ken o ajanga kin asem Ao, Lotha aser Sumi nungertem Naga Hoho nungi atsüngina alitsü lemtetba telemtetbaji akangshir ta metetdaktsüogo.

Kasa onük nungsa state government aser Naga Hohoi committee shima aliba purtemi ajurunüra CNTC kübok aliba kin asem kija-kija masü saka külemi dang CNTC tenüng nung ajurutsü ta parnokisa telemtetba ka agiogo.