NTC & CNTC-i sen crore 37 kongi ao ta asüngdanger

Dimapur, July 12 (TYO): Mongulbar nikongdang Referral Hospital, Dimapur anasa RCC Girder Bridge chirepba lendong nung nisung 4 asüba aser 5 yiruba atema kanga aoksar aser temulung raksar, ta Nagaland Tribes Council-i sangdong ka nung metetdaktsü.
June 2015 nung ketdangsertemi iba apu tendanga reprang aser apu raksaogo ta kuli agütsü. Maneni, Road & Bridges department-ia iba apu tendang aser tashimait ta kuli agütsü aser district administration-i apu nung mesenzütsü tenokdangba agütsü. Ajisüaka, mapang tatsüka dang lirbo tenokdangbaji agien aser apu nung senzüsenbongtsü lapokba ajanga iba lendong atalok, ta NTC-i ashi.
Iba apu majungba atema State PWD-i kasa tesem nung RCC Girder Bridge ka yanglutsü atema asüngdang aser ibaji Union Ministry of Road Transport and Highways-i agizüka, July 28, 2015 nung sen crore 37.66 lemzüktsü. Union Ministry-i PWD department dang ita 24 tsüngda apu yanglutsü atema tetuyuba agütsü. Ajisüaka, iba apu yangluba maparen metenzük aser senzüka toktsüba ajanga nisung takümtem samaogo aser temeket aliba yimtsüngtemi timtem ajuruogo, ta parnokisa shisem.
May 6, 2016 nungi March 31, 2017 tashi, ita 11 tsüngda State PWD(R&B)-i demand No. 58 kübok 62 payments agizükogo aser sen ajak agi crore 342, lakh 22 ser meyijang 8 agizük. Ajisüaka, Nagaland putiotsü nung tang ya gari lenmang majungba tensa tamajungtiba ajurua lir. Anungji, Minister in charge-i item tasüngdangba atema telangzüba agütsütsüla, ta NTC-i takhangba agütsü.
Nagaland nung public bo tang nüngdakbatem mongui aser infra-structure tem mali timtem tuoshi ajurur, saka külen asen MLA tembo Kaziranga nung oa benjungteper. Iba inyakyim ya tesempatsüka lir. Anungji, state sorkari iba tatalokba atema tekaratiba nung bushisüngdang asütsüla aser nisung taküm laluba atema aibelenertem ozüng tapet agi merenshitsü akhanger, ta Media Cell, NTC-i sangdong nungsa shia lir.
NTC-i tasür kibongtem den asükhu lemsateper aser yirua alirtem tekaratiba nung taneptsü angutsü sarasademtsür, ta ashi.
Central Nagaland Tribes Council (CNTC)-ia sangdong ka nung Niuland lenmang nung 4th mile apu chirepba bushisüngdangtsü aser aibelenertem merenshitsü atema takhangba agütsüogo.
Parnokisa, Ministry of Road Transport and Highways-i Project Zone-8 kübok July 28, 2015 nung sen crore 37.66 lemzüktsüba kong sama ta asüngdang.
Osangkakettem nung tebilemtsü abenba indang metetdaktsüba jagi meperir, saka apu yanglutsü sen agütsüba sülen küm ana süia tashi nung apu meyangluba aser iba apu yanglutsü nüngtem nung sen agizüka agiba indang kulitem agütsütsüla, ta CNTC-isa ashi.
Sorkari nübortem senzüsenbongtsü atema tang rongdak apu ka yanglutsüla aser aji meinyara, CNTC-i junger ta bilemba mapa inyaktsü, ta Media Cell sangdong nungsa metetdaktsü.
CNTC-isa public dang pei nem agüja aliba temetentem metettsü aser pei pei tesem nung terenlok mapa inyaktsü atema sen lemzüktsüba osangtsüsang meteta alitsüla, ta tayongzükba agütsü.