NTC-i BEFR aser Foreigner’s Acts atema nenshir

Dimapur, April 15 (TYO): Nagaland Tribes Council (NTC)-i BEFR aser Foreigner’s Acts tashi itta inyaktsü atema takhangba maneni agütsüshir.
April 28, 1977 nü Nagaland Indigenous inhabitants indang sangdong agütsüba nung aliba ama Nagaland nung lisopur nütsüng yongsük züngdangba mapa inyaktsüla. Iba ajanga osang chichiba metettsü aser taküm piyong atema Indigenous Certificate ka agütsüba ajanga jakzüker ajak asoshi Indigenous registration kuli ka ama amshitsü akok, ta NTC-i ashi.
BEFR Act, 1873 aser tanga sendaktepa aliba Acts shitak inyaktsü atema Indigenous Standard Operation Procedures latettsüla. Maneni, electronic devices amshia ILP maparen inyakba ajanga permit holders senzüsenbongba mita reprangtsü akok, ta parnokisa ashi.
Nagaland kübok district tangalen ozüng alema arubaji Dimapur ajanga lir. BEFR Act, 1873 kübok Dimapur medendaktsütsü lateta mali anungji Dimapur nung ozüng alema aruba nisungtem azüoktsü atema tashitait inyakyim ka nüngdaker, ta NTC-isa metetdaktsü.
Tourist aser tangartemi tiptema senzüsenbongtettsü atema check points lapoktsüla. Maparen ketdangsüa reprangtsü atema Home Department kübok permanent Cell ka alitsüla aser parnoki Land registration authorities, license authorities aser departments den permits/cards agütsüba mapa mita reprangtsüla aser osang metetpelatsüla, ta parnokisa ashi.
State sorkari BEFR(ILP) atema Committee tentettsü lemtetbaji kanga tim lir. Abhishek Singh lenisüba kübok Committee-i kanga dang meranga inyaker 2019 küm tetenzüklen sorkar nem report agütsüogo. Maneni JCPI-ia Committee den teyaritsü tim ajaklen yaritepba atema tenüngsang agütsür, ta NTC-i ashi.
Joko sorkari dang telemtetbatem agitsü anünga lir. Asen maitsü, temetentem, sobaliba aser teyari balaka angubatem kümzüka ayutsü atema telemtetba tajung ka nüngdaker, anungji State sorkari tasü itta Committee-i junger ta ashiba onüktem mapa küma inyaktsü ayongzüker, ta NTC-isa metetdaktsü.