NTC-i benokba PIL okadaki metentsür

Dimapur, November 25 (TYO) : Gauhati High Court, Kohima nung Justice L. S. Jamir tsüngdang Nagaland Tribes Council (NTC)-i State Vigilance Commission indang PIL benokba anogo ananü- November 21 aser 22, 2016 angadangba sülen pai iba ken o tembanga angar NTC metenja oshidang agütsüogo.
Nagaland nung ochimashi mapa inyakba mita reprangtsü atema bangdakpur nüngdak anungji June 8, 2016 nü Nagaland sorkari telemtetba agiba meyipa agiang ta NTC-i Nagaland Chief Secretary nem tezüluba nung takhangba ka agüja liasü. NTC-i state sorkar dang State Vigilance Commission nem akhi ama tashi agütsütsü atema ayongzük saka sorkari ibaji magizükba ajanga NTC-i public ajangzüktsü mechi High Court nung ken o benoktsüsa aküm.
Iba ken o ya NTC tenüng nung Sr. Advocate Taka Masa-i jembi aser pa den Advocate Arenlong aser Advocate Ms. Khrievono nati yaritep. Okadaki iba ken o ya public atema kanga tongtipang ta agizük aser PIL nung ashiba ama June 8, 2016 nü cabinet telemtetba agientsüogo.
Okadakisa June 8, 2016 telemtetba ajanga bushisüngdangba maparen nung tetsükdaktsü ajurua aliba onüktem ajak tanaben tenzüka bushisüngdangtsü atema tetuyuba agütsü. Iba oshidang ajanga state sorkari tesüiba mapang ama State Vigilance Commission indang jenjang bener arutsü imlar, ta NTC-i sangdong ka nung metetdaktsü.