NTC-i Dimapur nung nisung tepsetba aitsür

Dimapur, October 26 (TYO): Anüngdang sangwaa lia Rupak Singh-i Alino Lotha tepsetbaji NTC-i sashia aitsür, ta tanü NTC Media cell-i sangdong ka ajanga metetdaktsü.
“Mapa kanga tamajung inyakbaji lokti tentet ajaki aitsütsü tetemsü, iba den külemi aibelener nem tekaraba nung obendang agüja tapet temerenshi agütsütsü imlar. Alino tepsetba ken o ya bentettsü melamelar; anungji NTC-i police dang iba bushisüngdang tekaratiba nung tembangtsü mepishir. Nüburtem jashibaji October 25 nü public rally ajanga sayuogo, anungji sorkari iba ya süoki ia agitsüla,” ta NTC-isa metetdaktsü.
“Küm shia tetsürtem anema aibelen ken o kanga züindar, anungji sorkari item ama ken o kera bentettsü atema fast-track courts amenoktsü asoshi shisadanga inyaktsüla,” ta NTC-isa metetdaktsü.