NTC-i Naga yimten latettsü lenmang teyur

Dimapur, Oct.25 (TYO): Naga yimten tebilemtsü latettsü asoshi inyakba maparen nung tanü tensa kechi takoktsü lir, itemji angateta telatetba agidaktsü tajungba asütsü, ta Nagaland Tribe Council (NTC) sangdong ka ajanga metetdaktsüogo.
Shitakba nung asenoki angatettsüba kaji India kübok Naga nunger lushi state balala kübok aliba ya yimten ka kübok melongjemtettsü, anungji Naga nunger asoshi tajungtibaji tang Manipur nung United Naga Council (UNC) teloki parnok asoshi yimten telatetba balaka bushiba ama state balala kübok aliba Naga nungertemjia parnok rongnung tangatettep nung aser nüngdakba purtem den shisalemsatepa parnok asoshi yimten jenjang tajungba ka parnoksasa latettsü asoshi melatsüla, ta NTC-isa metetdaktsü.
“India sorkari aiben Naga yimten nüjiso aser Naga nunger alushi state balala kübok alibatem yimten ka kübok longjemtsüba onükbo tejembia mejembitettsü ta yimjak nung metetdaktsüogo aser tan August 3 nü India sorkar o NSCN-IM na tsüngda tangatettep ka yanglubajia India temzüng kübok Naga yimten jenjang latettsü asoshi renemba ken o ka dang lir ta kanga junga angatetter, anungji Naga nunger asoshi kechi takoktsü, ibaji agizüktsüla,” ta NTC-isa metetdaktsü.
Parnokisa ashiba agi, India den ken o renemdang, Naga nunger asoshi asangsang nung ataloktsüba mapatemji Naga yimten nüjiso onükji benoka mejembitsü aser Naga nunger lushi ajak yimten ka kübok melongjemtettsü, anungji tang amai dang alitsü, anungji ajemajema aliba dang nungibo Naga nunger tanga state nung alirtema pei dang ajungba yimten jenjang kaka Manipur nung UNC purtemi inyakba ama inyaktsü melatsüla.
Naga nunger lushi tangjema alibatem ka küma longjemtsü asoshi 1960 küm renemba 16 Point agreement nunga state balala kübok alir Naga nungertem nem parnoki mulungba ama telemtetba agidaktsütsü asoshi clause 13 nung shia lir ta NTC-isa nenshia metetdaktsü.
NTC-isa ashiba agi, 1951 küm Naga plebiscite agibaji India temzüng kübok tangatettep ken o kar renemtsüba asoshi masü saka Naga yimten nüjiso asoshi liasü. Naga nungertemi 1929 küm Naga yimten jenjang balaka nung alitsü atema tezüluba nung Simon Commission nem agütsübaji Naga yimten otsü tejangja ka lir aser iba sülen Naga National Council tenteter plebiscite agi, idangji Naga nunger 99.9-i Naga yimten nüjiso aginüa temeyong anem aser ibaji tanü tashi shitak lir, anungji Naga yimten jenjang ka latetba maparen nung iba plebiscite ji endokra, ibajibo Naga nunger asoshi otsü tongtibang ka masütsü.
Anungji, tanü tensa kechi telemtetba agidir agiang, iba jagi Naga nunger jangraba aser temeten mangutsüsa tenokdangba ka masütsüla ta NTC-isa metetdaktsü.