NTC-i Prime Minister Modi ayongzüker

Dimapur, Luchii (December) 11 (TYO): May 19, 2017 nü Nagaland Tribes Council (NTC)-i Working Committee ta ser Naga National Political Groups (NNPGs) 6 adenba sabang ka tentetba osang nü dang metetdakja liasü ta NTC-i India Prime Minister dangi shidi ka zülu.
“Nü lenisüba kübok Working Committee-i India sorkar den yimten olemteptsü mulunga lir ta onoki nü dang ashi aser nai lenmang lapokja October, 2017 nungi telok ana tsüngda yimten olemtep tenzüker joko küm ka süiogo” ta parnokisa ashi.
Küm tashi olemtepa arudang GOI representative, official negotiator aser Working Committee tsüngda nüngdakba onüktem benoka kanga junga jembishinür asütsü ta imlar. India sorkari sendaktepa alir ajak anioka yimten latettsü atema inyakba mapa NTC-i angateta lir aser pelar, ta NTC President Toniho Yepthomi aser General Secretary Nribemo Ngullie nati shidi nung shia lir.
Indo-Naga yimten tebilemtsü latettsü atema Naga nungertemi onok taginüba shiyonga arur aser joko iba asoshi tatembang telemtetba ka agitsü atema India sorkari mapa inyaktsüla aser ibaji Prime Minister-i kanga junga meteta lir. Anungji, NTC-i India sorkar dang mapang meindoki olemtep maparen ya tatembang kati arutsü atema inyaktsü ayongzüker, ta NTC mendenpurtemisa Prime Minister dang ashi.