NTC-i Rajnath Singh-i jembiba onük ameter

Dimapur, February 22 (TYO) : February 19, 2017 nü Union Home Minister, Rajnath Singh-i Imphal nung “GOI aser NSCN(IM) tsüngda framework agreement agiba nung Manipur dak sendakba ojang ka danga mali” ta jembiba atema kanga süngmanger, ta Media Cell, Nagaland Tribes Council sangdong ka nung metetdaktsüogo.
Tenangzüktep nung Manipur dak sendakba kecha mali. Manipur ta asüba tenünga tetshia mali ta Home Minister-i ashibaji kanga dang tesüngmangtsüka lir. Iba ajanga agreement framework nung Nagaland state indang onüktem dang dena lir ta kuli agütsür, kechiyong Nagaland den kidangsüa aliba state shinga indang litsü nung mekongshitsü ta Rajnath Singh-isa shiogo, ta Media Cell sangdong nung shia lir.
India sorkar aser NSCN(IM) tsüngda ‘framework agreement’ agitepba sülen ita 19 tashi süia arur saka Nagaland nung aliba Naga nungertemibo iba tenangzüktep nung kechi onüksa lir’ar, ka danga memetet. Iba tenangzüktep nung tongtipang onük ana- pei sasa yimten yimsüsüba aser Naga nunger ka küma longjemtsüba indang mali aser iba tenangzüktep ya India Linük Temzüng kübok dang lir, ta NTC-i angajemer, ta sangdong nungsa shisem.
“Nagaland nung aliba lisopur Naga nungeribo, onoki memeteti aser temelaba magütsüi agiba tenangzüktepji magizüktsü ta NTC-i India sorkar aser NSCN(IM) aser ano Naga nunger ajak dang metetdaktsür. Nagaland state nung onok kiburtem lir aser onoki Nagaland state taginüba asoshi inyaktsü aser küzmüka ayutsü temsüa lir,” ta NTC-isa metetdaktsü.
Nagaland nung malir kati Nagaland nung lisopur Naga nunger dang nungi temelaba magii tarutsü atema telemtetba agibaji kodanga magizüktsü aser ibaji bendangertemi meinprongtsü merangba mapa ka ama züngshitsü, ta Media Cell sangdong nungsa shia lir.