NTC tenzükba anogo among, nübortem asoshi inyaktsü akangshi

Kohima, Oct 12 (TYO) : Nagaland Tribes Council (NTC) tenzüker küm asem ajungba mong tanü Bodbar nü Red Cross conference hall, Kohima nung mongogo.
Iba sentong nung jembidang, NTC tir Wb.Lentinokdang Aoi sentepa alir Naga nungertem dang Naga nungertemi ajuruba tebilemtsütem kokteta aotsü asoshi Naga nunger ajak külemi inyaktsü nüngdaka kümogo ta metetdaktsü.
Naga nunger asoshi koktettsüba tebilemtsü tulutibaji Naga yimten tebilemtsü ya lir, saka Naga nunger otsü shitakba nung ammeter inyaktsü melen tom ka nung kibur akoksatsüsa raksar lir ta paisa ashi.
Iba ama yimten nung teraksa jenjang yanglushitsü asoshi nüngdakba purtem ajaki pei mulung lapoka shilem agitsüla aser nübortem longjemshir Naga nunger nükjidong atongtsü asoshi inyaktsü tim ta paisa metetdaktsü.
NTC tenzükli nungi Naga nungertem tangar nem mezüngmeshi mesüdaktsüi akümketa alitsü asoshi temelenshi tajung bener arutsü nüngdakba ken o ajak shinga metsübui dang inyaka aruogo ta paisa ashi.
‘ Tanü tenzükba mapa ya merenemi asen jala jabasotem nem medoktsüli saka tarutsü putu asoshi renema toktsüdi,’ ta paisa ayongzük.
Kasa senden nung Zhovehu Lohe-ia jembidang, NTC tenzükba ya nisung karibo aitsütsü renema lir, anungji NTC ya mangdang makaba aser mapa meinyaktetba telok ka masütsüla, iba jagi dang nübortem nüngdak aser taginüba atalokdaktsütettsü ta metetdaktsü.
Iba sentong nungsa NTC advisor tasenba, Krurovi Peseyie-i mapang tatsüka agia jembidang, NTC tenzükli nungi ajak den putepa alitsü aser iba teloki shinga telok aser government manemer saka telok nung telemsa adokba, ochimashi inyakba aser nübortem akoksatsüsa inyakba mapatem anema nokdaker ta ashi.
Iba kasa tangatetba nung NTC ajanga Naga nunger lemsar aliba ya longjemtsü aser kidang kiyongertem den putepa alitsüsa inyaktsü imlar ta paisa metetdaktsü.
Iba sentong nungsa NTC tenzüktsü asoshi Lumbe Meru advisor shim aser Ahovi Jimo o Visa Meru na executice council asütsü shim aser Khevishe Achumi general counsel asütsü shimtet.