NTCP District Level Coordination Comm. senden amen

Dimapur, September 26, 2019: September 26, 2019 nü Dimapur DC conference hall nung NTCP District Level Coordination Committee 2buba quarter senden amenba noksa nung angur.

Dimapur, September 26 (TYO): NTCP District Level Coordination Committee 2buba quarter senden September 26, 2019 nü Dimapur DC conference hall nung menogo, ta ketdangsertem osang ka ajanga metetdaktsü.
Iba senden lenir ADC Dimapur-i moko achiba ajanga takoksa balala metetdakja sensotem nem iba awareness agütsütsü ayongzük.
Education department-i kaketshirtem dang moko achiba indang takoksa balala indang awareness agütsüba atema pelaba lemsatepa ADC-i stakeholders ajak dang iba onük atema ajak longjjmer inyaktsü ayongzük.
State Nodal Officer, NTCP, Dr. Tetso-i NTCP kübok mapatong tasen inyakba osang metetdaktsüba den külemi school ketdangsertem densema stakeholders ajak dang tobacco free school sangdongba nung shilem agiba atema pelaba metetdaktsü.
Moko achiba ajanga takoksa balala nenshia metetdakja Tetso-i lanurtem dang lenirtemi moko atema ozüng tesashiba yanglutsü atema nüburtem teyari bushitsü ayongzük.
Senden nung Mass Communication Department, Patkai Christian College-i adokba Anti Tobacco Campaign video ka saya aser GHS, Nahabari aser Viphuho Foundation High School, Purana Bazar na nem tobacco free school certificate agütsü.