NTPC nung broiler apokba kuli mongin committee kati bushisüngdangtsü

New Delhi, November 03 (Agencies): Uttar Pradesh kübok Raebareli nung power plant ka apokba tatalokba bushisüngdangtsü atema National Thermal Power Corporation (NTPC)-i züngsem asemi akumba mongin committee ka tentetogo.
State meyong NTPC power plant unit ka apokba lendong nung Hokolbarnü tashi nung asür ajak agi nisung 32 jungogo. Kasa tatalokba nung nisung 100 dak tema yirua liasü.
Osangbenertem den jembidang NTPC Zonal Director, R.S. Rathi-i, “Iba lendong kuli jangjatsü atema onoki züngsem asemi akumba mongin committee ka tentetogo. Iba committee nung NTPC Director mendenbuba asütsü,” ta metetdaktsü.
Rathi-isa, iba committee-i anogo 30 tsüngda osang agütsütsü, aser aibelener nem tapet temerenshi agütsütsü, ta shisem.
NTPC-isa iba lendong nung asür shia kibongtem nem senotsü teyari sen lakh 20, kanga mejungi yirua alir shia nem sen lakh 10 aser tera yirua alir shia nem lakh anana agütsütsü ta nangzükogo.
Rathi-isa, Uttar Pradesh sorkar aser Raebareli district ketdangsertemi iba lendong atalokba sülen kanga yaritepogo, ta ashi.
Ano külen Brihostibarnü National Human Rights Commission-ia Uttar Pradesh sorkar dang hopta trok tsüngda iba lendong atalokba osang tejangja agüjang, ta metetdakja lir.
Tamalen Uttar Pradesh Chief Minister, Yogi Adityanath-ia iba lendong nung asürtem kibong shia nem sen lakh anana, mejungi yirua alir shia nem sen 50,000 aser tera yirua alir shia nem sen 25,000 agütsütsü, ta sangdonga liasü.
Raebareli ya Congress Tir, Sonia Gandhi indang Lok Sabha constituency lir.