Nü bank account tim mesüi amshidaktsüra temerenshi alitsü

New Delhi, November 18 (Agencies): Hokolbarnü sorkari nüburtem dang, December 30 tashi nung ochimashirtem indang sen deposit asütsü atema nenok indang bank account tamshidaktsü, mesüra temerenshi alitsü, ta metetdaktsüogo.
Ochimashir kari parnok indang black money ji sen tasenba agi melener angutsü atema tangar indang bank accounts amshir, aser tim masüba nung account amshiba atema account kiburtem nem sempet agütsür ta osangtem angazükba sülen sorkari nüburtem tekümdangtsü osang ya metetdaktsü.
Tim masüba nung Jan Dhan accounts amshiba osangtema lir.
Tamalen sorkari, aayangertem, tilateri inyakertem aser ki mapa inyakba tetsürtemi account nung sen lakh 2.5 inoktsübabo Income Tax küboki maiter, ta metetdakja lir. Jan Dhan account alirtemia sen 50,000 tashi deposit sütettsü.
Iba dak sentakba nung tanü Finance Ministry sangdong ka ajanga, “Iba senji account kibur indang masü saka tangar kar indang süra temerenshi alitsü. Nisung shibai pa mesüra la account ji iba atema tim masüba nung amshidaktsüra, Income Tax Act ozüng kübok ken o akatsü,” ta metetdaktsü.
Sangdong nungsa, black money agi sen tasen melenba nung nai yaritepa amalitepa inyakra na-a aibelener ka akümer, ta metetdaktsü.
“Black money nokdangtsü atema linük senso ajaki sorkar den meyaritepra, iba nükjidong takok mangutsü,” ta sangdong nungsa shia lir.
Ministry-isa nüburtem dang, item ama ozüng alema mapa inyakba metetra I-T department nem metetdakjang, ta mepishi.
“Black money ya meimchir anema ozüng alema inyakba ka lir. Onoki senso tajung ajak dang sorkari iba anema inyakba nung yariteptsü ajungshir,” ta parnokisa shisem.
Tamalen sorkari, December 31 tashi nung bank account nung deposit asüba black money nungji saru, sendem aser senchi shilem 200 alitsü, ta metetdakja lir.