Kohima, October 28 (TYO): Nagaland yimtiba, Kohima nung Rani Gaidinliu Museum yanglutsü onük nung Naga lokti tentettem aser state sorkar o atsütep liaka Nagaland University (NU) kübok Women Studies Center (WSC)-i ayongzüka tanü “The life and times of Rani Gaidinliu” indang shisatokden ka ayongzüka agiogo.
Assam, Manipur aser Nagaland nung shisalen sayurtemi, tongtibangsüa nüjiso rara ajanga obang meputep alitsüa akok, ajisüaka Centre sorkari Kohima nung Museum amenoker asünungji Naga nungertemi iba maongka agitsüla, ta shisatokden nung adenertemi bangjemtep.
Shisalen sayur, Centre for Manipur Studies, Manipur University nungi Dr. Vijayalakshmi Brara-i, Rani Gaidinliu museum ajanga shisashirtem, kaketshirtem aser research agirtem teyari tulu angutsü, ta ashi.
Okila jembidang NU, WSC Director, Dr Rosemary Dzüvichü-i, tamangba tsütsülen aser tetsür-tebur tebendang tsütsülen nungi mangatettep madoki, state yimtiba nung iba ama museum ka aliba ajanga tajangzükji state nung Naga lokti tentettemi angatettsüla, ta ashi.
Shisalen sayur aser IIT Guwahati nungi Historian, Dr John Thomas-i Rani Gaidinliu indang puti otsü, identity aser yimtenren nung shilem agiba indang presentation agüja liasü.
Lai, British nunger anema Gaidinliu-i saru magütsütsü mapatong tenzük. Iba mapatong ajanga British nungeri la tepuokdak ayu aser India nunger nüjiso anguba sülen ang la chiok, ta ashi.
Iba shisatokden nung Rosemary-i “In the web of Intolerance, Patriarchal nationalism, Racism and the Gaidinliu legacy: a Naga Feminist critique” onük nung jembi, Faculty Department of History NU, Thungchanbeni Kithan-i “Historical perspective on Gaidinliu” onük nung jembi aser Faculty of Department of English NU, Dr. N Das aser Richard Dzüvichü nati “One is not born but rather becomes a women: Myth and Miracle of Rani Gaidinliu” onük nung jembia liasü.
Tanep iba seminar ya tetushi tejaoker, Nagaland University Pro Vice Chancellor, Prof. Lal-i tenzükja liasü.
You must be logged in to post a comment Login