NU Lumami telok 21 buba MDFA semifinal-i iogo

NU Lumami aser Walunir Ritsung Artang na asayartemi tang tasayadak 21 buba MDFA football asayamong mezüngbuba quarterfinal asaya nung toktepa shilem agiba noksa nung angur. (Mokokchung, October 17)

Dimapur, October 17 (TYO): NU Lumami (PGSU-L) teloki goal 4-3 agi Walunir Ritsung Artang telok madak mezüngbuba quarterfinal asaya koka tang tasayadak 21 buba MDFA football asayamong semifinal nung shilem agitsü jenjang tanü Honibar nü nguogo.
Tanü asaya tenzükba mapang nungi tenzüka Lumami teloki tajungba asaya aser asaya tenzüker minute 20 buba nung Pumagying-i par Lumami telok asoshi mezüngbuba goal agütsü.
Ano, asaya tenzüker minute 25 buba nung Walunir goalkeeper-i Lumami midfielder kati metsüoktsüba ball tezülen metsüdoktsü merang saka ball-ji Lumami striker, Watimeren tsütsüleni oa pai par telok asoshi tanabuba goal agütsü.
Tesülen, asaya tenzüker minute 33 buba nung Mezhiisietuo-i par Walunir telok asoshi goal 1 agüja par telok jenjang tajungba kümdaktsü.
Ano, minute 4 süir külen, asaya tenzüker minute 37 buba nung Mezhiisietuo-isa goal 1 agütsüba yong asaya mezüngbuba shilem tembang tashi nung telok anapronglai goal 2-2 agüja kasa jenjang angu.
Asaya tanabuba shilem nung, asaya tenzüker minute 51 buba nung Kuhein-i goal 1 agüja par Lumami telok temaba jenjang nung ajungkettsü.
Ano, asaya tenzüker minute 58 buba nung Pumgaying-i goal 1 agütsüba yong par Lumami telok goal 4-2 agi temaba jenjang aküm.
Tesülen, asaya tenzüker minute 67 buba nung Mezhiisietuo-i hat-trick yanglua par Walunir telok asoshi 3 buba goal agütsü.
Ajisüaka, tanüngba asaya mapang nung par Walunir teloki goal ka danga magütsütetba yong par teloki tanü asaya nung tamakok angutsüsa aküm.
Taoba asaya nung yellow card temerenshi ngua alisang, Lumami goalkeeper, P Doson-i tanü asaya nunga yellow card temerenshi anguba yong pai par semifinal asaya nung shilem magitettsüsa kümogo.
Tanü asaya nung match patron, Nukshimatong Pongener, BDO, Tsurangkong-i MDFA nem sen 10,000 tenlaba osanga jangjaogo.
Ano külen, Youth Department, Ungma Baptist Church-i tanep, Honibar anepdang MDFA asayadak, Imkongmeren Sports Complex, Mokokchung merüktettsüba atema asayamong tayongeri pelaba olen ka tanü sangdong ka ajanga metetdaktsüogo.
Taruba Hombar nikongtsütsü 1:00 ako nungi tenzüka Shitilong SA aser OCYU telok na tsüngda tanabuba quarterfinal asayatsü.