Nü tenük Tsüngrem dak ranglokang

Mosa o Aron nati lung jakdangji telokji sentepdaktsü, aser Mosai parnok dang ashi, “Nenok anema apusortem angang; onoki nenok asoshi iba lung nungi tzü adokdaktsütsü asü?” Zungdangba 20:10
Mosa Israel nunger tsüngdang aiben jashia tezü atang kechiyong parnoki temulung merang aser par tamang tashi meiti aküm. Kwiben ibaji atalok, Mosa jashi. Mosa kwiben Tsüngrem dak ranglokba nungi tenük agien iba taa angu. Pa keti dang par nübur yaritsü merangdang, küm lir arem nung san repranga ali (Anitet 2: 11-15) Israel nunger tsüngdang jashi nung lung nung ken asüktsü Tsüngremi ashiba pai anaben azük nung pa tenangzükba limaiaitsü lenmang shebang. Tsüngremi ashiba dak masü pa den aliba nübur dak ranglok nung aiben tejangshi ajuru aser pai bilemba ama inyakdang pa takoksa ajuru.
Iba ya mesüka aseni ajurutsü. Na meketa aliba nisung dakji sang ranglokra parnok tashi mait, aser pei sünutsü süa aliba angutsü. Idangji na jashia Tsüngrem tsüngdang aibelentsü. Saka nai temeshi Tsüngrem dak ranglokra nai item nübur asoshi aria bilemtsü, tatok angutsü aser talangka aremzüktsü.
Sarasadem: Tashi mait nung masü saka Nü dak ni ranglokdi. Amen