Nü vote sen yong teyok: Azo

Mokokchung/Dimapur, Tsüklai 22 (TYO): Nagaland Home Minister aser Naga People’s Front lenir, Kuzholuzo (Azo) Nienu-i voters dang clean elections nung shilem agitsüla aser pei vote sen yong mayoktsüla, kechiyong ibaji ajanga pei akhümket makai akumtsü, ta ashi.
Nienu-i, “Nenok vote ji ajanga nenok tarutsü tia latettsü, anungji nenoki pei vote mayoktsüla, kechiyong ibaji ajanga pei akhümket samatsü,” ta ashi.
Tanü Ungma yimdak 26 Aonglenden A/C NPF nüboyim sentong nung jembidang pai, “26 Aonglenden constituency ya state nung akhüm taket constituency rongnung ka lir, kechiyong iba ya pezüben tashi Chief Minister inyaksang, Dr. S.C Jamir aliba tesem lir,” ta ashi, ta Naga People’s Front, Central Headquarters, Kohima: Nagaland sangdong ajanga metetdaktsü.
Nienu-i, NPF candidate, Toshipokba ya kanga tongmelang aser ajemalu nisung ka lir; constituency nüburtem lenitsü atema pa nem maongka agutsütsü temsüa lir, ta ashi.
Taruba sorkarji NPF-i tentettsü, ta shia Nienu-i nüburtem dang NPF nem vote agüjang aser yimsüsüba nung shilem agiang, ta ashi.
NPF party manifesto dak sendakba nung Nienu-i, party-i tetsürtem nem tashi agutsütsü, anema alibaren aser shisaliok atema tongti süa inyaktsü, aser yimsüsüba nung temelenshi tulu bener arutsü, ta metetdaktsü.