Nübo tajungtem shimdi

Nagaland nung taruba sorkar ketdangsüa aotsü purtem shimtsü atema joko anogo ka dang anünga lir aser iba anogo ya Naga nungertem atema kanga dang tongtipang lir. 13 buba NLA election agitsü anogo sangdongba sülen nungi assembly constituency balala nung candidate temi nüboyimba mapa kanga meranga inyaktepa aruogo aser lennir aikati Nagaland melenshidaktsütsü, Nagaland nung temelenshi bener arutsü, Nagaland yanglushitsü, Nagaland renlokdaktsütsü indang tenangzükba agir magiba asenok tsüngdang agiogo. Talisa, political party nung lennir aikati par telok nem sorkar akümtsü tashi agütsüra, Naga yimten latettsü ta asüba tenangzükba taküm-a maneni agiogo. Iba inyakyim ya Naga nunger atema tasen ka masü kechiyong küm pungu sülen yimsüsürtemi yamaisa nangzükyonga arur. Election nung takok angutsü mechi nung lennir aikati yamaisa tiyazü tenangzükbatem agia nübortem ashiokja arur aser iba jagi asen Naga lima rajang küma lir. Hao, tesüiba mapang sorkar yimsüsüba menden nung amener ajakji tamajung, tiyazü jembirtem mesüra ochimashirtem ta ashirba masü saka parnok aikati o aser mapa na meputep inyaka aruba ajanga asen Naga lima tejakleni onüseta mouteti arur. Election mapang vote angutsü mechi nung süpokrem agütsüba den nübortem mesüzüktsü atema sentong balala nung tiyazü tenangzükbatem agiba lennir aika adokba ajanga asenok tanü iba jenjang nung alir. Arungma, temeim Naga nungertem, joko asenok iba tia nung malitsü atema asenok tangatetba melenshidi aser asen lima tejakleni anir aotsü atema nübo tajungtem shimdi. Asüng asenoki polling station nung oa asen senti vote ka agütsüba ajangaji tarutsü küm pungu tia yanglutsü. Nür constituency nungi toktepba candidate tem rongnung koba anga meshimtettsüsa nübo tajungtem dang alitsü akok saka nai parnok rongnungi Naga lima tejakleni anir otettsü ta asüba nübo ka nem nü indang senti vote agüjangma. Ano, constituency kar nungbo shimtettsüsa nübo ka danga malitsü akok, anungji iba ama constituency nungjibo nai NOTA (None Of The Above) ta asüba nung nü indang vote ji agüjangma. Asenok Naga nungertemi election mapang nisung tai shimba aser sen yong metemsüba candidate dang asen vote yoka achiba ajanga asen lima mainer aser merenloker. Anungji, arungma 13 buba NLA indang election ya khenyongi balaka südaktsüdi aser asenoki ochishia shimba yimsüsürtem nem sorkar tajung ka kümdaktsür asen lima azükarua tejakleni anir odaktsüdi. Tatem nung ya bilemtetang, “nü indang vote ji kanga senti lir, anungji nai kanga dang shisa kaa iba senti vote agüjangma.”