Nübo teimba alisangji Chief Minister asütsüla: Angh PB Acharya

Dimapur, July 15 (Agencies): Nagaland state nung yimten tsütsü mepetmesü adoka lia Angh Padmanabha Balakrishna Acharya-i Honibarnü nübo teimba aliba nisungji Chief Minister asütsüla ta metetdaktsüogo.
“Nagaland nung tang yimten takang ka nüngdaker. Shiba ket nung vote teimba lir pai kuli agütsütsü. Tang ya Democratic Alliance of Nagaland (DAN) züngsem teimbai TR Zeliang pusema nungiter aser paia lenisütsü tashi meshiogo. Ni India Linük Temzüng nung aliba ama dang inyaker” ta Acharya-i osangbener dang ashi.
“Tang teinyakdak Chief Minister Shurhozelie Liezietsu ji assembly nung lennir masü kechiyong pa election nung takok ngua shimba nübo ka masü. Külen, TR Zeliang ji lennir den DAN indang mendenbuba lir. Shurhozelie-i MLA akümtsü atema ita trok tsüngda election nung tokteptsüba liasü, ajisüaka Chief Minister shimba mapa nung ni shilem kecha mali, saka TR Zeliang-i züluba shidi nung Naga People’s Front (NPF) MLA 35-36-i sign süa liasü aser iba nungji ajemdaker dang ni mapa inyaker” ta paisa metetdaktsü.
Honibarnü Chief Minister Shurhozelie Liezietsu-i “Angh Acharya-i floor test agitsü tuyuba magizüker” ta nenshia metetdaktsü.
“Tang aliba sorkar tashi itta dang lir aser floor test agitsü nüngdak madoker. Politics ji züngdangba asaya ka ama lir, hao kü ket nung nübo peria mali, saka ni menden tekolakba bena lir. Ni anema confidence motion kecha benoka melira, kodaser floor test agitsü. Iba nungji ni ammeter aser maneni ammettsü. Party ajak kü den lir aser sorkar tashi itta dang odar” ta Shurhozelie-i osangbener dang ashi.
“Nagaland nung tang ajurua aliba tensaji taaktsüka lir. Ni state sorkar junga dang ketdangsüa aoer aser ozü telok kü den longjema nokdaka lir” ta paisa metetdaktsü.
Nagaland Angh-i Chief minister dang July 15, 2017 nung mesüra matongdang Assembly nung trust vote agiang ta tetuyuba agütsüba Guwahati High Court nung Kohima bench-i magii atatsü oshidang agütsüba sülen Dr. Shurhozelie-i osang metetdaktsü.
Angh-i tetuyuba agütsübaji temzüng alema, ozüngi memelar aser Linük Temzüng nung keta aliba onüktem alema lir, ta Dr. Shurhozelie-i High Court nung ken o ka benokba sülen okadaki July 17, 2017 tashi floor test magii atatsü tetuyuba agütsü.
TR Zeliang-i MLA 44-i pa pusema nungiter ta kuli agütsübaji Dr. Shurhozelie-ia hau ta agizüker, ta tanü Raj Bhavan sangdong ka metetdaktsü.