Nübor angati tenzüktsüla

Nagaland nung tang amai Chief minister, minister aser Parliamentary Secretary menden raktepba indang ya bilemdang dang, parnok ya nübortem tenzüktsü atema khuret rakteper asü mesüra yimsüsüba menden tajung nung mener senotsü tajangzük agitsü tebilemba nung rakteper ta aika mulungjang nung asüngdanga alitsü südi. Atangji, ajaki yimsüsürtemji temeim agi nübortem angati tenzüktsü asoshi yimten tashi ka aginüa yimsüsüba menden rakteper ta südaktsünüa bilemer. Ajisüaka, tanü yimsüsürtem rongnung yimsüsüba menden raktepba yabo angati nübortem tenzüktsü asoshi masü saka ita sen den allowance tajung agitsü aser talidak ki den gari aser bodyguard teperi angutsü aser akok tashi pei nem lemzüktsüba department nungi pei asoshi tajangzük agitsü tebilemba nung rakteper amai parnok jakla aser parnok mapa ajanga angatetter. Iba tangatetba yur nübortem madak yimsü asüba agi, tanü Nagaland nung dang masü saka India ajaklen yimsüsürtem anepaluba nung state rongsen aika endoker. Ibayongji, India tatar senden nung parliament nung süli mesüra state assembly nung süli, tatar menden ajak nungi shilem 15 (15%) dang minister südaktsür aser tanüngbaji MP aser MLA  jenjang nung dang ayur. Atangji, 15 % ta liaka, ano state tila asoshibo minister 12 tashi shimtsü tashi balaka agüja lir. Ibayongji, Nagaland nung minister 12 shimer. Tatar senden nung minister telemtet ka dang ayutsü telemtetba agibaji, MP aser MLA-tem minister menden nung ajakbo memendaktsünüba agi masü saka linük asoshi senotsü meyaka amshinüba aser kümzüka yunüba agi latetba ozüng ka lir. Aji oda, linük nung minister shia ita nung sen lakh dak tali endoker aser Parliamentary Secretary shia ita nung sen lakh ka shi ngua alitsü aser MLA-tembo ita shia sen meyirijang tenem dak tali ngua alitsü. Yimsüsürtemi alima mapayu nungbo aser nübortem memeimi inyakdi asübo, ano ita sen aser alllowance-tem dang nungibo pa senzüsenpongba nung endokba teimba asütsü. Item ajakji asadanger, yimsüsürtem dak yimten meyong rongsen aika meindoki kümzüka ayutsü atema minister aika mesüi telemtetba ka dang asütsüsa ozüng küma lateta doktsü. Ajisüaka, iba ozüngji paidoker, minister-bo 15 % dak tali mesüra minister 12 dang nungi tajemba meshimer saka parliamentary secretary aser Advisor shimer. Iba jagi ozüng latetba nükjidong amajok kümdaktsür. Iba timtem aser takoksaji reprangteta tawa Supreme Court-ia state nung Parliamentary Secretary shimbaji tai ta obendang agütsüogo. Iba osangji angashia,  “Supreme Court-i obendang agütsüba amato Nagaland nung Parliamentary Secretary-tem ajak anentsü nungbo koma süla ?” ta asüba tasüngdangba nung tazüngertem nem taoba hopta piyong bilemdangdaktsüogo. Aji oda, ajaki amato parliamentary secretary mayutsüla ta asüba tangatetba lemsatepogo. Atangji, yimsüsürtem rongnung ajaki minister sünütsü, aji meimchir yimya. Ajisüaka, timtem kaji ozüng lateta kar asünungji, pei state mulung masü saka linük nung ajak atema lateta akaba ozüngji amshitsüsa adoktsü. Iba timtem aser iba ozüng latetba nükjidong angateta akok tashi Nagaland ama state tila nung balaka, akok tashi, state meyong rongsen melaludaktsüi yimsüsürtemi nübortem temeim agi angati tenzüktsü merangtsüla. Koba lima nung südir süaka yimsüsürtemi nübortem meima aser pei linük meyong rongsen apayua tenzüktsü melen nübortem dang memeim aser pei lima mapayu pei ajungtsü aser pei ajangzüktsü dang bilema yimsüsüdir, ibaji pei lima raksatsü asoshi bomb tesashi yangluba den kasa asütsü. Alima nung yimsüsür ka asoshi nübortem dang meima tenzükba nungi anguba tepelatetka maka. Aji oda, nübortem  meyong rongsen ajak pei meyong kümer yangluba ki aser kechisarina ajak nübortem dangisa tanaben meyipa  aotsü aser tesüsa  Alexander tulusangi ashi ama, asenbo, teka tazüng aotsü. Ibaji meteta tanü nungibo yimsüsürtemi yimten agi business mekümdaktsüi ochishia nübortem angati tenzüktsü mulungtettsüla.