Nübor asoshi tenlaba

Tanübo government dak meimlai pei akaba ajunga agi pei nübortem timtemba nungi kümzüka anisüngzük agütsüba otsü ka lemsatepner. Atangji, ibai nüburtem asoshi lemzükba ajak nübortem nem magütsüi okzüka agitsü merangba putu ka nung asenok alir. Ajisüaka, iba ama mapang ka nunga nisung ajak mulungsüngzüktsüsa pei pension sen agi nübortem  jajatsü apu ka sen lakh ter dak tali endoka yanglutsüba nisungji asenokibo mangatettsü saka iba nisungba jagi asenoka nübortem asoshi tajung inyaktsü angazüktsüsa, pei nübortem meimba mapa agi inyaka sayuogo. Paji Odisha nung Kanpur yimtak nungi tasoba küm roker dak tali tain nisung ka tenüng agi Gangadhar Rout lir. Pa ya government mapa nung kiset shiurutem anepaluba mapa nung Inspector ka liasü. Pa kodang government mapa nungi anen, pa tejangrabaji pa mapa inyak tepiyong bendenba pension sen anguba nungi gari tajung ka alia amshitsübaji liasü. Pa asoshi kibong tebilemtsü mali, kechiyong par jabaso ana parnoksasa litettsüsa kümtetadoker aser jala ka kibong küma orr, anungji gari tajung ka alir pension sen chia ayongayonga jangratema alitsüba mapangji tang ya liasü. Ajisüaka, pa mulung nung teti animesüngzükteti bilemba khuret ka liasü. Ibaji par yimtak yimtaklirtem pei lui aodang Salandi ayong ajanga aor. Ajisüaka, timtem kaji tsüngluruwa mapangbo tzümetsüngba agi iba ayongji ajanga moutetter aser government-i iba ayong temdanga apu meyanglutsütetter. Iba jagi tamalena yangji alir lenirtemi anir Truck gari kiburtemi dena apu yanglutsü asoshi tenla tsüktepa bendenba agi sen lakh trokbo bendentet saka iba jagi apuji merenemtet. Iba jagi tang tashi yimtaklirtemji tsünglu tera aru majung, pei lui moutet takoksa ajurur. Iba ama timtem takoksa ajurubaji ngua Gangadhar Rout mulungji animesüngzüktet, anungji pai pa pension sen lakh terana endoka Salandi ayongji temdanga apu feet 270 ji yanglutsü tenzükogo. Iba sen jagia meperir, anungji taruba ita nung pa pension arrear anguba sen enoksema mapaji renemtsü pa tebilemba lir. Gangadhar Rout-i inyakba mapa den kodang asenok mapa aser jakla medemdangdir, asenokbo konganga mali bilemtsüsa taaktsüka lir. Asenokibo government-i lenmang, apu aser kiojen yanglutsüba sen chitsür mapa meinyak mesüra merenem toktsür. Iba amaji Nagaland nung government-i yangluba lenmang, apu aser ki merenemi toktsüba kwi lir (?) ta Rout-i inyakba mapa denji asenok mapa medemdanga asenok temulung meyiptsüla. Tatishitsü kaji, asenoki tenemtsüng lenmang yangluba mapa ya bilemdangra, asenokia Odisha nung Rout-i inyakba amajisa mesüaka government-i agütsüba senji shitak amshia inyak asübo, tang yabo Assam majangi Foothill Road nung senzüa lila ta bilemer. Joko, tang yabo Assam nung dena asenok senzüba lenmangbo majung asünungji, Bokajan o Golaghat na tsüngda Silonijan ajanga senzü majung lenmang kanga mejungi raksaa aliba agi tanga lenmanglen timtema senzür. Nübortemi item  ama timtem ajurubaji government nung alirtemi pei nübortem meima meinyakba agi aser mapa inyaker contractor-tem daka Odisha nungba Rout dak aliba nübortem meimba shisatsü maliba ajanga lir. Shitakba nungbo government mapa nung contract inyakba ya tajangzük angutsübaji mezüng masü saka nübortem anisüngzük angutsü asoshi terenlok mapa inyaktsür. Mapa dang shitak inyakerbo tajangzük lir saka asenok aikati government mapa inyakba ya nübortem tenzüktsü asoshi masü saka ita sen den  ano talila tajangzük aika angutsü imlaa inyaker. Gangadhar Rout ya asen ka asübo pension sen jagi pai bilemba amato gariang tajung ka alitsü mesüra aliang ka alitsü mesüra kiang yanglushitsü. Kodaser yim lenmang asen sen agi yanglutsütsü (?) ta asenokibo bilemtsü. Tanüa asenokibo yim lenmang yanglutsüba sen agi asen ki yanglur aser gari tajung alia amshir. Gangadhar mapa den kenyongi meputep. Paibo pa sen agi yimkong jajatsüba apu yanglutsü saka asenokibo yimkong asoshi inyaktsüba sen agi asen kija agitsü inyaker. Asenoka Odisha nungba dang nungi pei nübor meima inyaktsü angazükdi.