Nübortem jashiba tamaitsü

Yimti süngküm ajak nung ozüng dak maketba saru telok balalai sarur saka yimteni menokdangtetter. Iba jagi shishilembadak osettsüset aser chiyongtsü ajak nung jenjang atur. Ano saru onsara nungji tayokertemia oset tajungbo bener marur aser oset tamajung nung sen tur ayoker. Kechikomaka südirsüaka, tayokertemibo takoksa nungbo mayoktsü, anungji telok balala tershi nem agütsüba saru ajak to enoker ayoktsü. Aji oda, saru sarur nem agütsüdangbo gari kibur mesüra dokan kiburi agütsür amai saka pai agütsüba senjibo par dokan nung alirtem dang nungi sarua agütsüba sen lir. Asenoki ajuruba timtem aser takoksaji aji dang masü saka kidangi, office-i aser dokan-i arur kari o tajung meshia sen meshitsü aser karibo amokmerena meshitsü aser magütsüra injang khaloktsütsü. Ano, terenlok mapa inyakba ajak nung shilem ka meshitsü, anungji iba jagi mapa junga meinyaktettsü ta asen lima saru saruba lima ka kümer kangshir. Iba saru jagi asen lima kanga junga inüseta mainer. Aji oda, külen sarusachi aser külen ochimashi agi asen lima rajang küma lir. Iba tia nung nübortem peladi asüyonga mepelatet tajashi tia nung lir. Nagaland asoshi lendong kaji tanü tia yagi Naga nunger tsüraburtem dangbo lanurtem tejashiba aser iba tejashiji kodang tulu kümdakja pokdaktsüdir, ano Naga lima nung azü tokshitsüsa lendong ajurutsü. Ano, Nagaland-sa asüyonga tashiyim agi sarusachiba mapatem ya Dimapur nung teimba ataloker. Iba jagi Naga nunger ajak akoksar kechiyong Nagaland nung shishilembaba yimti tulutibaji Dimapur lir. Asenoki shishilembadak electronics osettem, jangotsü, kisüjensü dang agiba osettem aser moko sali tashi  nung  Dimapur o Mokokchung na tsüngda jenjang asadangra Dimapur dang nungibo kanga agia Mokokchung jenjang tajemba aser dalangba asadangtettsü. Ibaji Mokokchung district nung yimteni sarusachi mesüdaktsüba ajanga atalokba osang tajungtem lir. Kong kechi mapa nung südir süaka tashi ajak madak nübortem tashisa tuluba, anungji koba yimten aser loktii nübortem nem teyari aser tejenokdak agütsütsü melen nübortem kangshitsüsa aser tsübuseta alitsüsa inyakdir arr mashitsü. Iba amaji alima tesem balala nung mapang mapang shia nübortemi tejashi marem longkak aita yimten atsüngdokba aser melenba angur. Nagaland nunga tang amaisa ao nungbo memenui kasaji ataloktsü. Ozüng alema sarusachi asüba aser nisung amokmerenba mapatem anema yashi Dimapur nung nübortemi longkak aitba sentong kanga takok ngua agitetogo. Ajisüaka, asenok mapa yangji matemer. Telokbo senshiogo saka asenokbo ano teinyaktsü aika anünga lir. Joko, Nagaland ya tiyazü mejembiba, awashi temetet aser ajaki mapa shitak shitak inyakba state ka asütsüla. Joko, Nagaland süngküm nung saru sarur kata mamentsüsa aser Nagaland nungbo jail nüngdak mali akümtsüsa asenoki inyaktettsüla. Aji tasak masü. Tema purtema sang, telongpurtema sang, joko Nagaland nüngku bentetja Nagaland (Welcome) gate nung saru sarua mamentsüla, iba jagi Nagaland-i aitertemi asenok inyakyim aser loktiliba topur mejungi angur. Joko, asenokbo Nagaland kechi agi topur ajunger aji inyakdi aser nübortema komaka inyaknung anisüngzüka alitsü, ibaji shisadanga tilaka nungi asüyonga tenzüka inyakdi. Alima nung pelaa alitsüba ya kanga nüngdaker aser tanü putu government nükjidongji nübortem pelaa lidaktsütsü asoshi lir. Iba nükjidongji meteta government nung alir yimsüsür aser ketdangsertemi inyaktsüla. Joko, tanü nungibo ni pelaa alir malir ta masü saka nübortem pelaa alir asü malir ta reprangdanga inyaktsübaji yimsüsür aser ketdangsertem mapa asütsüla. Iba amajika mesüi nübortem masü pei dang pelaa alitsü merangra mepelatettsü. Ozüng anema inyakertem peladaktsütsü merangdang nübortem jashidaktsüra, ajibo Tsüngrem jashir asütsü. Iba lendongji asenoki mebushitsüla.