Nübortem jashioka lir

Tang Nagaland nung municipal aser town council election dak aketba tebilemtsü mekokteti hopta ana tashi nübortem tejashi nung longkak aita amongba yagi nübortemi government dang jashiba tulu liasü ta angatetter. Nagaland nung aliba Naga kin ajaki government anema longkak aiter asünungji, ibaibo yimten telok ka anema masü saka government anema nübortemi tejashi marem ola adokba ka lir. Tanü Nagaland nung nisung shingaia government dang pelaa mali, kechiyong government nung alirtemi nübortem ajungtsü asoshi inyaker masü saka parnok ajungtsü asoshi dang inyaker. Nübortembo senotsü maka den government mozü kidang taneptsü mengutetba agi sentsüh aika tsüa shiranger anepalua senzür mekümzüktet pei apuani, tsürabur aser jala-jabaso südaktsüba otsü lir. Itemji temulung ayangtsüka. Item temulungjang nungji government anema jashiba tulu aremoka lir. Nübortem sen makaba den government school nung education junga mengutetba agi Tsüngremi tanurbo tajung moatsü saka anepalu mesütet taküm raksadaktsüba tsürabur aika lir. Item temulungjangtem shirangbaji tulu aser item mulungjang nungjia government dang jashiba tulu aremoka lir. Aji oda, tanü Nagaland nung aluyimertemiang government dang tejashiba, contractor-temiang tejashiba aser government tenzükertemiang tejashiba ta government dang shinga pelaa maliba mapangji tang ya lir. Lanurtema tsüraburtem sentsüh tsüdakja zünger mapa mangur aser government-i parnok asoshi lenmang tajung ka mesayutetter, ajisüaka parnoki ngua government nung alirtemi anüng tonga kiojen yanglua sayudang aser alima nung gari tajungtiba nung mener alilen alirtem tiabo kecha hau ta mali senzüa angudang, lanurtem ain adoker. Item lanurtem mulungjangji ali telonglen volcano adoktsüsa ali tango tatsük adenshiba amai lir. Ibaji tanü pokteta adokdi asür. Ibayongji, lanurtemi pei taküm samaa mesasai government dang parnok jashiba sayuner. Aji oda, government mozü ki, school ki, gari lenmang aser aluyimertem tia ali tonga luagi reprangdanger tatar senden nung itemji süoki ia benoka jembitsü melen, tanü Nagaland tatar senden nung tatartem tejembitsü onük kecha maka ser senshiba jagi nübortem tali jashidaktsür. Nagaland nung lanur tazünger aser mazünger paikati mapa maka kazütepba tebilemtsü indang kisüng tatar senden nung süoka jembi nunga anogo ka nungbo mejembimatsüsa tebilemtsü tulu lir. Ajisüaka, item tebilemtsütemji mali ama tatar senden nung süoka mejembiba jagi balaka lanurtem tarutsü teimla samadaktsür. Aji oda, alima asoshi lendong aketba purtemji teimla samar senzür lanurtemji lir. Alima nung item tebilemtsü aliba agi government alitsüsa akümer. Ashih, alima nung ya tebilemtsü mali tepela aser tesünep dang ali asübo government-a menüngdaker. Iba nüngdakji meteta government nung alirtemi inyaktsüla. Aji oda, government nung alirtemji tenarong tazüng, tenük techira aser nübortem nüngdak angatetba mulungjang alitsüla. Government nung alirtemi nübortem madak kibur ama mebilemi kilir ama bilema tenzüktsüla. Tanü Nagaland timatembaji lenirbo agir magima saka nübortem temzükerbo kata mali ta asüba tebilemtsü lir. Lenirtemi nübortem tenzüker masü saka pei ajungtsü, pei akatsü aser pei ajangzüktsü indang dang bilema government nung inyaker. Iba jagi tanübo nübortemi lenirtem dak temulung malemer aser parnok aküm metsübur. Aji oda, nübortemi yimsüsür, lenir aser tulurtem ya parnok madak yimsüsür, lenir aser tenzüker masü saka auer aser ashir amai dang bilemer. Tanü Nagaland nung nübortem matsüngdang yimsüsür aser tulurtem noksaji aji lir. Iba noksaji reprangshia nübortem jashir. Tanü asenoki ajuruba tebilemtsüji aji lir. Iba noksaji memelen tashi nübortem mulung animesüngzüktsü. Iba noksaji melentsü asoshi yimsüsür aser tulurtem shisatsü melentsüla aser pei takar akümtsü asoshi masü saka pei lima aser nübortem takar kümdaktsütsüsa tenzüktsüla. Iba noksa jagi dang nübortem nem teimla tasen ka agütsütettsü aser asen lima nung tesünep alitsü.