Nübortem longkak aitba tajangzük

Taoba ita January nungi tan February ita tom ka tashi Nagaland ajunga nung government office aser shishilembadak dokan kata melapokdaktsü, garia mesenzüdaktsü aser nisungtema kechalenia moi mokdangba sentong nung shilem agiba ajakji rongsen tsütsü asadangra takoksa tulu anguba asadangtettsü. Ano, rongsen tsütsü akoksabajibo yutsür nisung asem taküm laluba takoksajibo kecha dena medemdangtsü makoktsü. Ano, municipal aser town council election agitsü aser aitsü merangba mapatem nunga government dang masü saka candidate aika akoksaogo.Item ajakji kodang bilemdangdir, Urban Bodies Election magidaktsüba aser T.R.Zeliang chief minister menden nungi agienba ajanga Naga nunger kechi tajangzük angu (?) ta aikati JCC ( Joint Co-Ordination Committee) aser NTAC ( Nagaland Tribes Action Committee ) anema jembia alitsüa akok. Itemjia tejembila jembir. Ajisüaka, asenoki ano tajangzük anguba tsütsü meyiper reprangdangra, asenok rongsen laluba, nübo atsükba aser nisung taküm lalubaji amajokbo masü ta asadangtettsü. Nagaland kümer taoba küm 54 tsüngda state government-i telemtetba tai agiba anema Nagaland nung aliba kin ajak longjemer longkak aita mokdangbabo kodanga matalok. Aji oda, tang municipal aser town council election magidaktsütsü asoshi Naga nunger kin ajak ka küma longjemer nokdakba yabo Naga yimten aser loktiliba otsü nung tongtibang tatalokba ka asütsü. Iba ama nübortem longjemer election magidaktsübaji dang masü saka chief minister dena menden nungi agienba tashiji tulua ta nübortemi government nung alirtem dang sayuogo. Iba tatalokba yagi tang nungibo government nung alirtemi nübortem nükentsübutsüsa kümogo. Ibaji nübortem asoshi tajangzük tulu asütsü. Ano, tang atalokba mapatem yagi Nagaland nung alir tanur tain ajaki Naga nunger temeten indang süoki ia bilemtsüsa tangatetba agütsüogo. Aji oda, Nagaland ya India kübok kechikomaka jenjang nung aliar memeteti tapi agidang lia aruba, tangbo tanur tain ajaki 16 Point Agreement nung kechi ali aser India temzüng arla 371 A nung kechi lateta ali ta metetnüa bushitsü tenzükogo. Aji oda, yakta Nagaland akümba otsü aser Naga nunger temeten ya Nagaland nungbo kakketreju nung azüngtsüsa akümtsü. Ibajia asenok asoshi tanü tensa ajanga bener arutsüba tajangzük asütsü. Iba amai asenok temeten jembia jembia Nagaland Municipal Act a nübortemi aginüba ama melenshitsü, anungji ibajia nübortemi longkak aita nokdakba tajangzük asütsü. Item dakji alaka, Nagaland government yimsüsür aser ketdangsertemi akhi amabo ochimashi mapa sademsademabo meinyaktettsü kechiyong parnoki tang ama nübortem longjemer parnok mapa anema longkak ait nungbo ta arendaktsü aser tsübua bilemtsü. Aji oda, ULB election magidaktsüi nokdangba ajanga Nagaland nung temelenshi tajung adokbatem rongnung Nagaland nung alir Naga kintem ajak longjemer külem ajungtsü asoshi inyaka aotsü bangjemba ya asütsü. Alima nung Nagaland nung alir Naga kintem longjemtsüsa tasakba, iba jagi Naga Hoho nung kin kar, ENPO nung kin kar, NTC  aser CNTC nung kin kar ta telongjembo telongjem saka pei pei sasep nung longjemba dak alaka kin ajak lokti tentet ka kübokbo melongjemteti arur. Ajisüaka, tang ULB elction magidaktsütsü asoshi Nagaland nung alir Naga kin ajak bangjemtetba ya Naga nunger asoshi tebilemtsü agi anar temoatsü aru amai asütsü. Iba tatalokba maparen  ya ajanga Municipal Act tajungba küma melenshir ULB election Nagaland ajaklen agitsü, linük temzüng arla 371 A indang tali tejangjaba nung angatettsü, government nung ochimashi mapatem tuluka nokdangtettsü aser Nagaland nung alir Naga nungertem lokti tentet ka kübok ka küma longjemtettsü. Iba tashi nung Nagaland state ya tangang tenzüker amai tasensa tenzüka aotsü takoktsü aser teimla tuluka angur.