Nübortem mapang

Election ya nübortem dak aketba yimten tashi aser temeten sayutsü aser jangjatsüba mapang lir. Atangji, yimten tashi aser temetenji dang masü saka nisung shia pei jakla aser tangatetba temai adoka sayuba mapang kaji election ya asütsü. Aji oda, democracy nung nübortem asoshi anogo tajungtibaji election agiba anogo ya lir. Iba tangatetba nung Nagaland nung alirtem ajaki election agitsüba anogo ya pei taküm, kibong aser pei lima yanglushitsüba anogo ta bilema yongyaa ataer shilem tajung agitsüla. Tang tashibo election ka agili, Nagaland nung National aser State highway tamajungba, election ka agili govt school result tamajungba, election ka agili mozü ki tesempatsü taketba kümli, aser election ka agili Nagaland sentsü tali kümli ta election ya Nagaland nung alirtem asoshibo timtemdaktsütsü arur amai arur. Kasaji tanga joko election ka agitsü mapang nenjunga arur asünungji, Nagaland telong raksababo yimsüsürtemi dang meteta alitsü saka tema nungi reprangtsüa Nagaland soru kanga mejungi kümogo. Lenmang majungba agi, Naga nunger-a ta nümadanga mesenzüteter, apu anokzüba agi taküm agi tendanga ajanga süir, tezüknem aser teshinem agi govt hospital-i ao majung aser govt school-tem nung tazünger mali aser police department nung ochimashi inyakba agi joko Nagaland police-tem dakbo temulung melemtettsüsa kümogo. Ibaji asenok ajak asoshi tarendaktsü, tetsübutsü aser shisabolutsü mapang lir. Item tensa tia tamajung anendaktsütsü aser yanglushitsüba mapangji election lir. Ibayongji, taoba hopta nung asenoki “Nagaland nung general election ya taküm kümsa agi nunga koma süla ?” ta asüba tasüngdangba nung shisalemsatepogo. Atangji, telangzürtemi election kodang agidir agiaka timi agitsü asoshi renemtsü nüngdakba ken o süoki ia lemsatepogo aser ano kari tang yimsü tesüdakpurtem Kazirangi alu manenba mapa anema jashiba lemsatepogo. Item ajakji nübortem mulungjang nungi adoker. Tang ya nübortem ajak kanga jashia lir, kechiyong yimsüsür aser lenirtemi nübortem pei lima nung nümadanga shisamebului alitsüsa teimla magütsür. Kibong shia nung jala jabasotem zünger mapa mangu aika lir. Tsürabur rongnung ka shirang nung Nagaland nung taneptsü mangur. Iba ama tia nung nübortem election atar. Ashiko, election arudang nübortemi timtem marem pei vote, pei temeten ayoktsüa akok, kechiyong sensaker ayatzüraba nisung ka tsüngdang amtsük long kajia tsüngrem amai lir. Aji oda, sensosa süaka meshimetsür ka dak pai mulungba shimtsüsa tashi mali. Iba amaji election aru shia pei vote ayoktsüsaba tia nung nübortem yutsübaji yimten yimsüsürtem karibo metetsümonga inyaker. Aji oda, yimsüsür aikati nübortem tebok sünga anisüngzüka lira, pai mesüra lai ashiba mangatsü amai bilemer, ibayongji akok tashi nübortemji tanü boksüng bushia alitsüba tia nung yutsür. Meimchir yimya nung kodang chiyongtsüa melilir, tasü maiter aser pei temetena mejembitetter, anungji nisungsa süaka nisung masü amato akümer. Item ajakji nübortemi angatettsüla aser talisa sensakertemi pei taküm, kibong aser pei lima tensa tia melenshia tajungba kümdaktsütsü asoshi tenla ka ama khenbo timtem aremtsüla aser shinga nema pei temeten malizükdaktsütsüla. Alima yimya agi, timtem ka majangi tajung ka marutsü. Ibaji angateta, taruba election kodang arudir arung, asen lima yanglutsü asoshi tenla agütsütsüba kaji machimajem aya arema pei vote piesasa pei mulungba nung tetsübu makai enoktsütettsüla. Asenok ajaki kasasa shilem tamajung agia Nagaland raksaogo, anungji asenoki raksaba asenoki yanglutsü atema nisung shiai tenla kabosa agütsütsü nüngdaker. Iba tenlaji makamait aremba, vote asoshi sen aika agütsüyonga magi aremba aser timtemyonga pei vote piesasa agütsüi aoba mapatemji asütsü. Iba tenlaji asenoki taruba election nung magütsütetra asen lima tang dang nungi kanga agia tamajungba, tesempatsüka aser tetsübutsüka kümer alitsü. Iba amaji mataloktsüsa asen tetsü tasoli Nagaland asoshi asenok ajaki tenlatepdi.