Nübortem meimba Tir APJ Abdul Kalam süogo

Shillong, July 27 (Agencies) : India nung Tir 11 buba inyaksang APJ Abdul Kalam Hombar nikongtsütsü Meghalaya yimtiba Shillong nung ajungbena süogo.
Hombar nikongtsütsü 6:30 ako meta Indian Institute of Management, Shillong nung o tejembidak nung arishi küm 83 tain Kalam lao aser pa Bethany hospital-i anepalutsü atema anir ao saka pa taküm mekümzüktet.
Bethany hospital nung doctor temi ashiba agi, pa temulungjang mapa meinyaki aküm.
“Tir Kalam aonung 7:00 ako meta mozüki dangi anir aru. Pa mozüki tonga arudang tango sashiba tembanger liasü. Pa ICU nung anioker shia arudaktsütsü merang saka takok mongutet” ta Bethany hospital ketdangsertemi ashi.
Centre sorkari taoba Tir aser ‘Missile Man’ APJ Abdul Kalam asüba atema linük ajunga nung anogo tenetnü mangyimtsü telemtetba agiogo, ta Union Home Secretary, LC Goyal-i metetdaktsü.
Home Minister Rajnath Singh-ia Dr. APJ Abdul Kalam ajungbena asüba atema jashia mang ayimba osang metetdaktsüogo.
Dr Kalam dang Missile Man of India ta ajar aser 1998 küm Pokhran-II nuclear test takok ngua inyakba nung pai shilem tulu agi. India nung Tir inyakertem rongnung nübortemi kanga saklokbaji pa liasü aser iba jagi pa dang People’s President ta-a ajar.
Pai linük asoshi mapa tajung inyakba atema Padma Bhushan aser Bharat Ratna sempettem agütsü aser 2002 nung pa India nung Tir 11 buba inyaktsü shim.
Dr Kalam ya October 15, 1931 nü Tamil Nadu kübok Rameswaram nung sensaker kibong ka nung aso.
Pa tebu ya rong anir ka liasü aser mapang kabo Abdul Kalam-i par kibong aser pa shisaliok bushiba nung yaritsü atema osangkaket lema senzüba mapa inyak.
Pa Madras University nungi Physics nung graduate asü aser pai fighter pilot ka akümtsü jangraba metongtet saka pai aerospace engineering azüng. 1963-’64 mapang pai linük toktsür United States.National Aeronautics and Space Administration (NASA) nung azüng.
Iba sülen pai DRDO, ISRO nung inyak aser 1992 küm chief scientific advisor to the prime minister mapa inyak.
Pa indang tatembangba tweet ji : “Shillong-i aoer, srijanpalsingh aser Sharma na den IIM nung Livable Planet earth indang sentong nung adentsü” ta pa asütsü ghonda 10 shi lia yokba liasü.