Nübortem nem ozüng aser pei temeten angatetdaktsütsüla

Kohima, April 13 (TYO) : Senso shia atema obendangdak ochi obendang angutsü tim, anungji nübortem nem temzüng ozüng nung aliba temeten angatetdaktsütsüla ta Gauhati High Court nung obendanger, Justice L S Jamir-i metetdaktsü.
Obendangdak ken o benoka jembitsütsüba jenjang ya kanga tasak aser nübortemi pei temeten memetetba den sensaker aser makamaitertem atema okadak ken o benoka jembitsü atema teyari angati agütsütsüba onüktem ya ajak asoshi kanga süoki ia bilemtsüba mapatem lir ta All Nagaland Meet of District Legal Services Authorities sentong ka tanü yangi Kohima nung akadang, Obendanger L.S.Jamiri metetdaktsü.
Atangji Nagaland nung mapang mapang shia telok balalai nübortem nem temzüng ozüng aser pei temeten indang angtetdaktsünübayong mapang – mapang shia tesem balala nung ‘legal aid camps’ aser ‘legal aid clinics’ sentong ayongzüka nübortem nem tangatetba agütsütsü merangaka, ano nübortem nem pei temeten angatetdaktsütsübaji mapang talangka agitsü ta paisa ashi.
Item sentongtemji agia aotsü atema Legal Services Authorities (LSA) tenteta lir aser parnoki loktiliba nung makamaitertem nem obendangdak ken o benoka jembiba nung teyari angati agütsür. Ano, memenui nübortem nem ochi obendang agütsütettsü nükjidong nung Lok Adalat tenteta lir.
Aiben okatsür taintemi sensakertem angati yaria obendangdak ken o mebushitsüner, iba jagi makamaitertembo aiben ochi obendang mangur ta L.S.Jamirisa metetdaktsü.
Nagaland nung Justice & Law department nung tezülur Kharinla T. Koza-ia kasa sentong nung jembidang, linük temzüng arla 36 aser 39(A) nung senso shia nem kasasa ochi obendang agütsütsü shia lir aser iba jagi ochi obendang aser maongka kasasa agütsütsü temeten agüja lir ta jangjar ta metetdaktsü.
” Asenok ya loktiliba nung kanga sensakertem tenzüker ama bilema inyaktsüsa kümogo, parnoki rongsen nung dang masü saka temetetba nunga kecha mali,” ta laisa ashi.
Anungji, LSA mapaji angati okadak nübortem yaritsübaji kisüng masü saka nübortem nem temzüng ozüngi agütsüba temeten jungjunga angatetdaktsütsüla ta laisa metetdaktsü.
Obendangba maparen nung inyaker ajak ya tangar dang nungi balaka maongka angubatem lir, anungji parnokji parnok mapa inyakbaji kisüng masü saka timtema alir aser mangatetba purtem pei mapa aser temeten indang angatetdakja angati yariba ajanga ochi obendang angutsüsa tangatetba agüja yaritsüla ta laisa metetdaktsü.
Iba sentong nung onük tapu aika benoka shisalemsatepba mapang liasü.