Nübortem nem sen aputsütsü sentong tasen ka tenzüker

Dimapur, Sept 29 (TYO) : Linük nung peisasa mapa tilakabo inyaka senotsü ajangzükner saka sen tapudak maka timatemertem asoshi teyarir tajung ka aru amato, tanü Mongolbar nü Nagaland nunga Union minister of state for External Affairs & taoba Army chief Gen (Retd) Dr. VK Singh arua Pradhan Mantri Mudra Yojana (PMMY) sentong ka lapoktsüogo. Iba sentong ya Dimapur Town Hall nung agia liasü.
Iba sentong tenzükja jembidang, peisasa business tilakabosa tenzüka onür saka senotsü agulen lenmang mali timtemertem asoshi iba PMMY sentong ya teyari tuluka asütsü ta VK Singh-i metetdaktsü. Linük nung nisung aika peisasa mapa ka tenzüka inyaknüaka sen maka aser ano nija dang sentem tulu agi sen apuba amshiba ajanga takoksa aser lendongang ajurur ta asüba tia nung lir, anungji item nemji teyari agütsütsü nükjidong nung iba PMMY sentong ya tenzüker ta paisa ashi. Iba sentong tenzüka aoba ajanga sensakertem aika sen tetemlok tulu agi sen aputsürtem ket nungi kümzüktsü ta paisa metetdaktsü.
Iba sen ya bank ajanga aputsütsü aser sen aputsü purtem asoshia inyaka aodang melaa melaa inyaka orr sen aputettsüsa inyakyim tongmelang ka dang yangluja lir ta paisa ashi.
India ato kilonser, Narendra Modi-i Pradhan Mantri Mudra Yojana sentong ya April 8, 2015 nü “manufacturing, service, small business aser trade” maparen tenzüka otettsü asoshi nisungtem nem sen aputsütsü tenzük. PMMY ajanga sen apubaren tapu asem lir, kaji Sishu aser iba tenüng nung sen Rs 50,000 tashi autettsü, ano kaji Kishor aser iba sentong ajanga sen Rs 50,000 nungi Rs 5 lac tashi aputettsü aser ano kaji Tarun aser iba sentong ajanga sen Rs 5 lac nungi Rs 10 lac tashi aputettsü. Iba sen apudang tajung kaji, iba sen apuba tenüng nung security kecha mayutsü aser processing fees kecha magütsütsü. Iba sen aputsüba sentong aser nükjidong nübortem nem angatetdaktsütsü asoshi tanü yangi Dimaur nung amongba ama linük tesem ajaklen tenzüka mongdagi. Iba sentong ya October 2 tashi aotsü.
Tanü iba sentong nung Dimapur nung lapoka aliba bank 27 nungi ajak arua denogo aser tesem balala nungi shilem agia adenertem nisung 600 shi liasü.
Iba sentong nung state sorkar nungi Parliamentary secretary, Mhomlomo Kikon aser T Amenba Yaden na dena liasü.
Iba sen apui arurtem akok tashi bank nung inyakertemi yaritsü aser center sorkari imlaba tongtsütsü merangtsü ta SLBC mendenbubai metetdaktsü. Tang tashi nung bank-tem ajanga Mudra loan 977 nem agütsüogo aser sen jenjangji sen crore 5.24 liasü. Iba denji Nagaland nung tang tashi nung SBI branch 64 nung Mundra loan nisung 492 nem sen crore 1.36 aputsüogo