Nübortem ola

Tawa Mokokchung town nung tashiyim agi tetsür tanurtem taküm raksatsüba mapatem atalokba anema Ao kin lokti tentet tetsüditem ajak longjemer lokti senden ayongzüka akaba ya mapang shitak ka nung sentong shitak ka ayongzükogo. Tanü ama alima mejungi küma oa alidang tebushir aser tanüker kibur mali ama toktsüra tamajungertem temulung ulutsü aser alima tamajungba küma aotsü. Nisung kati teraka aibelendang, ibaji loktii mesüra yimteni mangu ama toktsüra, iba jagi tamajung inyaktsü ajungshir amai akümtsü. Ozüng raksaba mapa tamajung yabo kinunger-pi kecha mali, ozü yimer-par yimer ta bilemtsü menüngdak, takar- sensaker bendangtsü kecha menüngdaker, tamajungji tamajung, anungji shiba südir süang memenudang melenshitsütsüla. Atangji, taochiji aibelener atema, anungji aibelener dang taidok agütsütsübaji tim dang lir. Ajisüaka, tai aser tadok menangzüki taidok agütsüra, iba jagi ano ozüng raksar aser tamajunger taliang adoktsü. Asenoki taidok agütsüba ya mangateti agütsür, iba jagi taidok angurtemi iba taochiji retreta mezüngshir. Tatishitsü agi, okadak temeim agi sünga aliba obendanger kati aibelener ajak dang taochi sayua tadok dang agütsü nung alima ya koma akümtsü ? Iba jagi alima nung ozüng raksartem tali tali akümtsü aser tamajunger merenshitsü ozüng latetba nükjidong amajok akümtsü. Aji oda, nisung ka mapa agi tasütsü temerenshi agütsü langa aliyonga tasübo mesüdaktsüli saka akümli piyong tepuokdak yudi ta asüba obendang nungji taochi aser taidok lir saka ano aibelenba asoshi temerenshia lir. Ozüng raksartem merenshiba ya aibelenerji merenshinüba agi masü saka lokti tesünep nung tetsübu melii linüba agi lir, anungji aibelener merenshiba ajanga maibelenertem asoshi tekümdangtsü lenmang sayur. Iba amaji tashiyim agi nisung taküm ka raksatsüba mesüra lokti menentsüsa inyakba mesüra nisungtem nem takoksa tulu bener arutsüba mapatem anemaji temerenshi alitsüla. Iba jagi dang kija taküm azüoktettsü aser lokti tesünep nung alitsü. Atangji, lokti menentsüsa inyakba mapaji tashiyim agi tetsür tanur anema inyakba mapatemji dang masü saka yimten aser lokti nung ochimashi mapatem inyakba ajanga kija, kibong aser lokti ajak menentsür. Government maparen nung ochimashi inyakba ajanga nübortem tangutsü tim mangur, alima renloktsü melen tamajungba akümer aser temsüa malir kar takar aser tulur akümdang temsüa alir aika ajemoka toktsür. Tanü kidang kiyonger state ajak nung light tashi agir magima adoka agidang, kechiba asen lima nungbo industry lapoktsübajibo yutsür tesangwa kisüng atema amshitsüa meperir ? Kechiba asen kidang kiyonger state-tem nungbo gari lenmang tesadem aser tajung nung tatashia matashii senzüdang, asen lima nungbo gari ana ta junga metsüiteptetba lenmang tamajung nung temang nung tashidak ajak atenteta senzür ? Kechiba kidang kiyonger state-tem nungbo asayadak stadium tajung yangluba agi asayar tajung adokdaktsü dang, asen lima nungbo asayadak stadium kata meyanglutetter ? Kechiba asen lima nungbo governmenr school junga moutetter ? Kechiba mozü ki junga anepalu mesütetter ? Kechiba tzü bener arua mejemdaktsütetter ? Kechiba asen lima nung züsentetba aser yanglutetba agi asenok takar küma melitetter ? Item ama kija kibong aser lokti ajungtsüba mapatem nung government nung alirtem temulung agüja ochishia inyakdaktsütsü atema nübortemi ola adoktsüla. Lenmang majung, light marur, mozü kidang shinga mali aser school agi school memesük akümer, itemji asen jakdang ataloker. Ajisüaka, asenoki itemji anema ola madoker ! Iba jagi tenzükertemi pei sünütsü süa mashimashi inyaker. Kiburi tenzükertem dang lenmang junga yangluang, light shitak arutsüsa temulung agüja inyakang aser tzü shitak arudakjang aser school aser mozü ki shitak anepaluang ta mapang mapang shia tonga orr meshira, tenzükertemi temulung magütsütsü. Tanü lima aser government nung kiburji nübortem lir, anungji government kübok department ajak shitak arakzüka nübortem asoshi ochishia inyaktsü atema nübortemi teti ola adoktsüla. Tetezü, kodangsa nübortemi government mapa ka nung meshitaki reprangtetdir, idangjisa complaint asütsüla aser complaint agütsübaji mangara ano nübortemia ola adoktsüla. Iba amaji asenoki asen limaji tim nung ola adoka yanglutsü tim.