Nübortem ola angatsüla

Tang Nagaland nung Municipal aser Town council election magitsüla ta nübortemi ola adokaka mangashi amai state government-i Dimapur Municipal Council aser town council ishika nung election agitsü asoshi sentong atonga aoba ya government asoshi shisa makaba mapa ka asütsü. Nübortemi memulungba mapa ka government-i tashiyim amshia inyakba jagi lendongang ataloktsü aser government nung alir o nübortem na prongla akoksatsü. Government nung alirtemi angatettsüba kaji municipal aser town council election magidaktsüli asüba ya opposition party kati government anemba ola ka masü aser nübortemia Nagaland nung kodanga iba election ya magitsüla ta nokdaker masü saka nübortemi melenshidaktsünüba onük kar lir, anungji ibajibosa angadangtsüla. Nübortemi municipal aser town council election magidaktsütsü nokdakba onüktemji Municipal Act nung ali aser ki nung tax agitsü laleta akaba agiendaktsüner aser tetsürtem nem menden 33% melemzüktsüner. Item ajakji Naga nunger yimten aser sobaliba dak keta alinungji India temzüng arla 371 (A) indang jembiba kanga angashir, kechiyong Nagaland state akümdang iba arla nung Naga nunger sobaliba temzüng ozüng, loktiliba, tamangba yimsü aser ali tema aser telong nung aliba rongsen dak aketba onüktem Nagaland tatar senden nung melemtet tashibo India parliament nung lemtetaka tamagitsü asütsü ta lateta lir.  Anungji, Lok sabha aser Rajya sabha nung Naga nunger sobaliba, yimten yimli, loktiliba, tamangba yimsü aser ali rongsen dak aketba ken o tapu aika ozüng küma latettsüa akok saka itemji Nagaland Legislative Assembly nung benoka jembir telatetba ka magi tashibo mapa küma mamshitettsü. Atangji, Nagaland Municipal Act ya Nagaland assembly nung latetba ozüng ka lir saka tang nübortemi magizüktettsüsa akümbaji nübortem den jungjunga masüngdangtepi tatartemi ozüng küma latetba agi timtem adoker. Aji oda, parliament aser assembly dangbo nübortemji temaba, tashi tuluba aser ozüng madak kibur ta yimsüsürtemi angatettsüla. Tatar senden nung kechi temzüng ozüng latetdir latetaka itemji nübortem ajungtsü asoshi latetter, anungji nübortemi memulungra, tatar senden  nung latetaka, mamshiang tajungba. Atangji, government-i ashiba ama ali aser ki dak aketba alimelen sarutsü aliba arlatembo taoba tatar senden nung agienogo, ajisüaka ozüng ka mapa küma aotsübaji tatar senden nung latetli pasasa mapa küma inyaker masü saka Nagaland Gazette nung adoka nübortem nem metetdaktsüba sülen dang mapa küma aor, ajisüaka yamaji mesüi aritepa election agitsü sangdongba ajanga süngjang mamendang ongsaa achitsü meranger amai kümogo. Mezüng timtemji yang nung jagi tenzükba reprangtetter. Tanabuba timtemji Naga nunger teburtemi dang masü saka tetsürtemi dena tetsürtem asoshi 33% shiteta yutsüba ya maginer. Ajisüaka, item inyakyim aser taginübaji junga masadangi election agitsü sangdongba ajanga osetbo tajung saka junga merenemi amshitsü merangdang raksa amai election agitsüba sentong agi nübortem o government na tsüngda tongpang rara ka amai kümogo. Atangji, government-i tetsürtem nem Urban Local bodies (municipal & town council) nung menden 33 % shiteta yutsübaji India temzüng arla 243 T nung lateta akaba ama inyaker aser iba jagi India temzüng arla 371 A anema aibelenba mali ta nokdaker. Ibaji nübortemi magizüktetter. Nübortem o government na tsüngda mangatettep adokba tesemji itemji lir. Iba mangatettepji tashiyim agi election agiba ajanga tangatettep kati marutsü, anungji election sentong ya mapang tatsüka asoshi thitema atar, government o nübortem na ajurutepa jembimatsüla.