Nübortem tia metettsüla

Nagaland government nung kilonser tazüngpurtem (cabinet) senden Kohima nung dang melii Kiphire nung oa alitsü apitetbaji kanga junga apitetogo. Naga nunger yimsüsür aser tulur aikati Kohima nung dang linür aser Kohima adena oa nübortem tenzüktsübaji temerenshi agütsü amai bilemer. Iba tangatetba aliba jagiang tawa mapang kabo Nagaland nung yimsüsür kati jakdaka dang government ketdangser ka nem temerenshi agütsür amai Nagaland anüdokleni yokba ajanga mepelatep adokba asenoki angazükogo. Iba ama tangatetbaji melenshir, asenok ajaki Nagaland tesem kong südir süaka nübortem tenzüktsübaji Tsüngremi nungloktsüba mapa ka ama bilema inyakra, kong kechi mapa inyakdir inyakaka mulungsua jangratema inyaktsü. Iba ama nübortem asoshi tajung inyaktsütsü bilemba minister aser MLA kati pei constituency toktsür tanga nung melinütsü. Iba ama nübortem yaritsü tangatetba aliba engineer, doctor aser tesayur kati Kohima aser Dimapur nungi pilar lenmang majung, mozü ki maka aser light-bo marur ta asüba tesem nungang lia nübortem tenzüknütsü. Item ama ketdangser aser tulurtem jagiang Nagaland asoshi temelenshi bener arutsütsü. Atangji, tanübo yimsüsür aser tulurtem amongdak tesem Kohima aser Dimapur-ang tamajungba kümdagi. Iba jagi Naga nungertem yimsüsür aser tulur kümer Kohima aser Dimapur nung linüba ya nübortem asoshi sentong tajung ka atonga temelenshi tajung ka bener arutsütsü asoshi linür masü, saka nübortem tenüng nung pei agitsü rongsen bendentsü asoshi linüba jakla mapa agi sayur. Lenmang tamajungba akümba shia, light junga maruba shia, mozü ki aset school ki junga meyutetba shia takar akümba Naga nunger takar aika lir. Takar kibong aika aliba tamaitsüji yimti nung ki tajung aika angur aser yimdong nung gari tajung agi masemer. Itemji asen lima takar akümba tamaitsü, ajisüaka tezüdangtsü kaji pei ki ajungba amaji pei amenba office masü, pei ki ajungba amaji school aser mozü ki masü, pei gari ajungba amaji pei jajaba lenmang masü. Item jagi asenok yimsüsür aser ketdangsertemi asen lima aser nübortem meimer asü memeimer, aji sayur. Yimsüsür aika election mapang nung dang pei constituency nung amongba purtem lir. Ano karbo pei constituency nung tanendak kia makaba purtema alitsüa akok. Item yimsüsürtem jagi nübortem koba ama bus gari nung mener  koba ama lenmang nung jajaar yimdangia marutsü. Item yimsüsürtem jagi nübortem ajungbena teboktashitsüka atudang parnok anasa aliba mozü kidang doctor mali aser aliyonga tashidak tendangtettsüsa masü ta ajuruba tia indang memetettsü. Iba ama tia jagi nübortem aika pei alidak taneptsü melamelaa angutsü melen pei among adena taneptsü bushia moutet arishi tembangogo. Ibaji dang masü, tanü Nagaland tesem aika nung government school majung akümba agi tanur aika school mezüngtet akoksadagi aser tsüraburtem aika pei chir private school-ia meyoktet timtem tulu nung lir. Joko, item ama timtem, takoksa aser asüama anojungi majurutsüsa, yimsüsürtemi nübortem den nübortem alidak külemi lia inyaktsüla. Aji oda, tang amaji senden amentsü asoshi dang masü saka nübortem tia aser nüngdak metettsü asoshi yimsüsür aser ketdangsertemi mapang mapang shia tesem ajak semdanga aotsüla. Atangji, Kohima nungi tayimtsü nung Nagaland tatembanglak tashi oagi monger aruba agi pei lima aser nübortem tia memetettsü. Pei lima tia metettsü asoshibo gari lenmang nung jajatsüla aser gari moutetdak tetsüng agi atongtsüla. Aji oda, tang amaji kilonsertem sendensa meliaka, yimsüsürtemi pei department mapaji Nagaland ajak reprangtsü atema lemzüktsü ta meteta ita shia district ka nungbosa monga ketdangsertem den shisalemsatepa nübortem asoshi nüngdak inyak tenzükra, yang nung jagi temelenshi aru tenzüktsü. Iba amaji  MLA shiai sentong nung adentsü asoshi ajadang dang masü saka pei nübortem asoshi bilema pei constituency medoktsüi mapang mapang shia yangji inyaker goverment ketdangsertem ajungshia inyakra, iba nung jagi asen lima aser nübortem tia tajungba küma melenshi tenzüktsü.