Nübortemi ashi angatsüla

Nagaland nung government-i municipal aser town council election aginür saka nübortemi magidaktsüner ta atsütepba ajanga Nagaland tesem ajaklen petsaperong adokdagi. Atangji, government-i iba election aginübaji town (urban areas)-tem tajungba renloka aotsü asoshi aginür. Tanü Nagaland nung terenlok mapa inyakba jenjang asadangra, town-tem dang nungibo yimtak yimtsüngang tajungba renloka aoba angutsü. Aji oda, gari lenmanga town-tem dang nungibo yimtsüngtem nungang tajungba yanglua angur. Item ajakji Delhi nungi yokba sen agi inyaker. Aji oda, yimtak yimtsüngtem nungbo Village council aser Village Development Board tenteta aliba ajanga Delhi nungi RD department ajanga yimtak yimtsüngtem renloktsü asoshi senotsü yoker. Iba sen jagi yimtak yimtsüngtem nung terenlok mapa inyaker. Ajisüaka, Nagaland nung mapang talangka municipal aser town council election magii aruba ajanga town-tem renloktsü asoshi Delhi nungi sen bener marutetter ta government nung alirtemi jembiba angashir, ibayongji Urban Local Bodies election agitsü nüngdak adoker. Tetezü Nagaland government-i Delhi nungi Urban area atema sen kwika angutsü ali, itemji meshizüka bener arua town-tem nung terenlok mapa inyakner. Ibaji tebilemba aser nükjidong tajung lir. Asenok ajak atema tamakok kaji tanü tashi Nagaland nung yanglutetba aser züsentetba agi rongsen kümdakja amshitsüsa kecha mali, iba jagi yimtsüng süli, town süli asen lima renloktsü atema Delhi dak dang metaloka lir. Aji oda, tang state government-i ULB election aginüba nükjidongji Delhi nungi sen bener arua urban area-tem renlokner ta angateter. Aji junger aser yamaji inyaktsüla. Ajisüaka, tebilemdangtsü aser tebilemtsü kaji nübortemi Municipal Act memelenshi tashibo election maginer aser magidaktsütsü asoshi kanga akanga nokdaker. Ibayongji, Kohima aser Mokokchung nungi shir town aika nung nomination-a magütsüdaktsü nokdangogo. Jungang tejung, shitaka süang tesü, nübortemi ashibaji government-i süoki ia angadangtsüla. Town renloktsü atema Delhi nungi sen bener arua inyaknübaji nübortem atema, ibaji MLA mesüra minister-ba atema masü, anungji nübortemi memulung tashi kangshiabo parnok asoshi terenlok mapa inyaktsütsü atema  election magitsüla. Aji oda, state government-i tang tesem ishika nung asüyonga election agitsü merangba agi, ashiko,Delhi nungi bener arutsüba sen jenjang dang  nungi tuluba takoksa angutsüa akok. Delhi nungi sen bener arunüdang, Naga nungertem kar dak danga tarak kettsü nungbo iba jagi takoksa-ang tuluba angutsü. Tang ama yabo sen dang nungibo nübortem temeimba meimtsüla. Delhi nungi sen bener arutsü mechi Naga lima petsaperongtsü agibo, terenlok mapa-ang meinyaki asenok meimtepa, putepa aser akümtsübutepa alibasa tajungba asütsü.