Nübur longejma lira yangji takok lenmang lir: S.Chuba Lkr

Mokokchung, October 20 (TYO) : Nüburtemi tangatetba nung kati ka den yaritepa lira mapatong ajak takokma nung bener aotsü, ta tanu Tongdentsüyong Ward nung Animal Husbandary and Veterinary Services Parliamentary Secretary, S.Chuba Lkr-i ashi.
Tanu Tongdentsüyong Ward nung S.Chuba Lkr Phukumertem Kimen Wb.Temjentemsü’er kidang adenshia sensaksemba sentong ka akadang pai nüburtem yaritepa aliba nungji tanang ka lir, aser ibaji ajanga nüburtem tsüngda telongjem adoker aser telongjem ajangaji alima renlokba nung shilem tulu agiteta alima tejakleni aoba nung tsüngkang medema nüburtem timi anitetter, ta ayongzük.
Longkumer-isa 2013 kum mezüngbuba süa election nung toktep aser iba mapang constituency nüburtemi tangatetba tajung nung yaritepa adokdaktsüba ama kasa tangatetba nung yaritepdaktsüner, ta adenshia aliba nüburtem ajungshia ashi.
Kasa sentong nung 24th Angetyongpang A/C NPF President Wb. Sentimar-i jembiba den Tongdentsüyong Unit Mahila nungi Tongdentsüyong Unit Youth nungi züngsemtemi jembi aser tantsü tambu aikati shilem agia jembia iba sentong kanga dang longso longsoa takokma nung kaogo.
Kasa anogo nungsa Parliamentary Secretary S.Chuba Lkr-i 24th Angetyongpang A/C NPF Sungkomen Unit nung Party lenirtem aser party pur aser nüburtem ajurua yangjia sensaksem sentong tajung agi.
Maneni October 19, 2017 nü nikongdang 24th Angetyongpang A/C NPF Alempang Unit nung Party lenirtem aser party pur aser nüburtem ajurua yangjia sensaksem sentong tajung agia liasü.