Nübur Meimba Lenirtem

Nagaland nung nübur meimba lenirtem agi anünger, ibayongji nüburtem okronger aser asen lima merenloker. Democracy lima ka asünungji nüburtemi lenirtemi shimteter. Nübur tenzüktsü shimtetba maongkaji ulurua aser akhümket tulu. Ajisüaka asenoki memoa, lenir aika dak nübur meimba shisatsü mangur. Lenir aika nübur tenzükertem masü saka pei kinünger adianutem tenzükertem dang kümogo. Social media nung ocettem reprangdangra sorkar, yimtenren lenirtem, ketdangsertem aser sorkar mapa inyakertem dak mulung masüba ocet aika angutsü, iba denji külemi ocet nung o semlok agütsürtemia mulung masüba indang jenti lemsatepba angutsü. Iba o jembitsüji jangramatem saka ochi o ka lir, aser ibaji jembitsüsa akümer, kechiyong tashimait asadanga mejembira asenok memelenshitsü aser asen lima maintsü. Nagaland nung mezüngbuba Legislative assembly election 1964 küm agi, aser iba mapang nungjagi tenzüka constituency shia MLA ajaki pei dang nungibo nüburtem taoba ta meima inyak asübo asen state ya komaka renloker lila ta shisadanger. Constituency shia nungi nübur meimba lenir kata mali asü?, mesüra nüburtemi tetemsü lenirtem meshimer?, ta khenkhenbo shisadanger. Nagaland state jenjang anguba sülen, asen state nunga Tripura nung tang teinyakdak Chief Minister, Manik Sarkar aser taoba mapang Tamil Nadu Chief Minister, Kumaraswami Kamaraj na ama nübur meimba lenirtem aika adok asübo tanü asen state ya koba jenjang ka nung lila ta bilemer. Taoba mapang TN Chief Minister, Kamaraj-i kodanga takar küma chuba ama alitsü menükshi. Pa achi-ajem, aben-süoshi aser libaliro kanga tongmelang liasü, aser pa CM inyakdang pai pa itasen shilem timbakati sensakertem yari. Pai pa ajuruner ajak ajuru aser akokba tashi parnok den sensaksem aser yimtenren lenirtem dena tsükchi maden. India nung yimtenren lenir aika amitsür/sangremer lir, yamaji ama pa-a kibong mekümi liasü aser takar akümtsü memerangi nüburtem meima tenzük. Ano külen tang Tripura CM teinyadak, Manik Sarkar ya kanga ajemalu aser tongmelang lenir ka lir. Pai anepdangshia pa süoshi shidoker, pai takar akümtsü memeranger aser pa meyong ki den gari kata mali. Sarkar-i ‘adjust’ süa sen agitsübo yutsür pa itasen 12,500 jia magii par party, CPI(M) nem agütsür aser pa kinungtsü pension agi dang kibong mesür. Ajioda India nung chief minister tem rongnung sensaktibaji Sarkar lir, saka nüburtem tenzükba nungbo pasa takartiba asütsü südi. Item kuli ajanga Tripura state renloker aser nüburtem anisüngzüker. Tena ama kanga tongmelang taküm meliaka nübur meimba tsütsü Nagaland nunga Chief Minister, Minister tem aser MLA ajak CM ana- Kamaraj aser Sarkar ama südaktsüner. Centre nungi tzülok ama sen molamoshia yokaka nüburtemi lenir tajung meshim tashi mesüra nübur meimba lenirtem madok tashi asen state merenloktsü. Ali rongsen bendenba yabo samatsü mesüra mapang ka nungbo magishitsüa akok. Tsüraburi tanurtem nem ali bendena yutsüyonga iba denji külemi tanur nem atakatem-a repsema bendentsür ang asütsüa akok. Ajisüaka, tenüng tajungjibo teti tetshitsü aser alimai tatishitsü tajung agitsü. Mamangertem state nung nübur meimba lenirtem lira Nagaland ama Khristan state ka nung nübur meimba lenirtem kodaser malitsü; Atangji constituency shia nübur meimba lenirtem alitsü. Kodang nüburtemi election mapang nung sen yong vote meyoki mesüra pei kinünger, kidong, yim aser tzükong mebendangi nübur meimba lenirtem shimdir, iba anogo nungjagi asen lima melenshi tenzüker asütsü.