Nübur nem TB indang rajemdaktsütsüla: Angh BP Acharya

Kohima, March 24 (TYO): World TB Day anogomung nung tanü Nagaland aser Arunachal Pradesh Angh, PB Acharya-i tim departments, lokti tentettem, melungtet teloktem aser kaketshir tentettem dang, longjemer TB tashitak samatsütsü atema nüburtem nem iba tashitak indang rejemdakjang, ta mepishi.
Angh-i, kümshia March 24 nü World TB Day amungba ya nüburtem nem iba tashitak indang metetdaktsütsü atema lir aser tanü TB ya alima tesem aika nung wara ka lir, koba ajanga kümshia nisung million ka ser tesadang tepseter, ta ashi.
Paisa ex-servicemen, university kaketshirtem, Bharat Scouts & Guides, Red Cross Society aser ratetjema alir sensotem ama tentet teneta aliba teloktem dang linük onük ka ama TB tashitak samatsütsü atema nija sasep nung aser tentet sasep nung inyaktsü ayongzük.
Angh-i ashiba agi, democracy linük ka nung linük yangerba nung sorkari dang masü saka rajema alirtemia shilem agitsüla.
Paisa, sen ishika indoka sorkari ketdangsüba Directly Observed Treatment Short Course (DOTS) treatment ajanga TB ya khenyongi aneptsütettsü, ta ashi.
Treatment aser diagnostic tetendangbaji alima nung TB agi tonga alir ajaki agitettsüla, aser iba tashitak ya tazüngla kümtsütsüla, ta pai ashi.
Acharya-isa, alima nung TB tashitak nung India-a khuret tulu lir aser mapang shitak nung treatment agiba ajanga aser tatem tashi treatment agiba ajanga TB tashitak prokba nokdangtsü, ta ashi.
Tebushitetbatem nung ajemdaker Angh-i, India nung kümshia nisung million 2 shi TB tashitak agi atonger aser iba tashitak ajanga kümshia nisung 2,20,000 shi asür, iba den külemi North East nunga kümshia TB agi shiranger shilem pongu shi asür, ta metetdaktsü.
“Item osang ajanga, nisung tepsetba tashitak ya alima nungi samatsütsü atema asenoki ano mera tali agitsüla ta sayur,” ta Acharya-isa shisem.