Nübur nem temeten agütsüba ajanga lokti nem timtem bener marutsütsü: Obama

Hanoi, May 24 (Agencies): Vietnam sorkari pei nübur nem temeten agütsüba ajanga Vietnam lokti tentet nem timtem bener marutsütsü ta US Tir, Barack Obama-i tanü, Mongolbar nü metetdaktsüogo.

Tanü agi Vietnam linük anogo tanabuba semdanga, Obama-i Hanoi yimtiba nung ayongba lokti senden ka nung onük jembidang pai iba olenji sangoktsü.

“Ni tan Vietnam semdangba ajanga asen linük ana tsüngda tanaben sentaktepshia, tesendaktep tajungba akümer,” ta shia, Vietnam-i nübur nem agütsüba temeten anema inyakba maparen anentsü asoshi Obama-i ajungshia liasü.

“Nübur nem tetsükdakba kecha meli pei tebilemba lemsateptsü, osangtsüsang prokshitsü aser lokti senden amentsü temeten agütsütsü asoshi Vietnam linük temzüng nung lateta lir. Aji oda, nübur nem temeten agütsüba ajanga lokti tentet nem timtem bener marutsütsü,” ta shia, Communist Party yimtenren telok dak alaka, Vietnam nung tentetba yimtenren telok balala nungi lenirtem nem yimsüsütsü tashi abentsü maongka agütsütsü asoshi Obama-i ajungshia ashi.

Hanoi kübok National Convention Centre nung agiba sentong nung Vietnam sorkar ketdangsertem densema, nisung 2,000 dak temai adenba osanga jangjaogo.

Vietnam sorkari yimtenren ken o nung ajemdaker tepuokdak nisung 100 dak tema puoka aliba osang ka nübur temeten asoshi nokdakertemia metetdakja lir.

Obama-i tanü onük jembiba jakdang Vietnam nung tentetba lokti tentet balala nungi lenirtem den tsüngdong ajurutepba osang jangjaogo.

Ajisüaka, nübur temeten asoshi nokdakpur aika Obama den majurutepdaktsüi nokdangba osanga angazükogo.

Obama den majurutepdaktsütsü nükjidong nung police-i sorkar anema ola adoker, Ngueyn Quang A pua Hanoi yimti tezülen ghonda 5 tashi ayuba osanga bushitetogo.