Nübur tenzüktsü atema police renema alitsüla: DGP

Kohima, October 21 (TYO): Hokolbarnü Nagaland Director General of Police, L L Doungel-i police tem dang nüburtem tajungtiba nung tenzüktsü atema renema alitsüla, ta ayongzük.
Kohima district kübok New Police Reserve, Phesama nung Police Commemoration Day Parade sentong nung police ketdangsertem aser police tem den jembidang Doungel-i, “Asenok police service-i aitsü atema shingaia kangshia majungshi saka asen sasa iba telemtetba agi, anungji Nagaland wangshitsü atema asenok dak nungi aginüba ama asen tajungtiba agi tenzüktsü asenok renema alitsüla,” ta ashi.
Pai ashiba agi, kümshia October 21 nü linük tesem ajaklen Police Commemoration anogomung monga taoba küm ka tsüngda taküm bendanga agüja asür tasütait police tem nem akhüm agütsür.
DGP-isa, 1959 küm October 21 nü Hot Springs Ladakh nung China nunger sepaitemi mendanger SI Karam Singh leniba nung CRPF Patrol ka amakba aser iba anogo nung sepai 10 asüba anogo nungi tenzüka Police Commemoration Day amongba indang metetdaktsü.
Kasa sentong nung Additional Inspector General (Ops) Temsu Ao, IPS-i roll of honour azüngdang, taoba küm ka tsüngda linük asoshi police 473-i taküm bendanga agütsü, aser asürtem rongnung Nagaland nungi-a constable ana- A Khekho Chishi aser R Bermong Yimchungru nata densema lir, ta metetdaktsü.
DGP aser Police Department nung ketdangertem den CRPF, SIB aser BSF ketdangsertemi taoba küm ka tsüngda taküm bendanga agüja asür sepaitem nüngtem nung Cenotaph nung narozük tokja akhüm agütsü.