Nübur tenzüktsü atema sabang tajungtibaji Congress lir: Kamat

Mumbai/New Delhi, June 24 (Agencies): Taoba mapang Union Minister aser Mumbai nungi ponguben tashi Lok Sabha züngsem, Gurudas Kamat-i sodi meshiba sülen tanaben Congress general secretary mapa agizükba sülen tanü pai, “Nüburtem tenzüktsü atema sabang tajungtibaji Congress Party liasü,” ta ashi.

“Yakünü ni Tir, Sonia Gandhi ajurudang, lai kü dang ajak rasaa ashi, aser lai ashibaji shitak ta ni bilem. Iba sülen ni tanaben iba party nung inyaktsüla ta lemtet. Nüburtem tenzüktsü atema sabang tajungtibaji Congress lir ta ni bilem,” ta Kamat-i osangbenertem dang ashi.

“Kü nem tanaben kasa menden, general secretary agütsütsü ta ni imlaa meliasü, saka Party Tiri ni kasa menden nung inyaktsü ta kü dang ashi,” ta paisa shisem.

June 6 nü Kamat-i sodi meshi, ajisüaka party bangdak lenirtemi pai sodi meshibaji magizük aser sodi meshibaji agiena party nung maneni inyaktsü atema pa dang mepishia liasü.

Mumbai Congress tongti, Sanjay Nirupam kuli ajanga pai party toktsür asü ta asüngdangba langzüdang Kamat-i, “Kü akümli piyong ni Congress tenzükogo, küm 45 tenzükogo. Kodaser Sanjay Nirupam ajanga nisung kati party toktsütsü(?),” ta ashi.

“Ni nija onük kar aliba ajanga ni party toktsütsüla ta bilem. Tesüiba ita asem tashi ni iba atemaji shisadanga liasü. Ni Rajasthan, Gujarat aser Dadra Nagar Haveli, Daman aser Diu sema senzüba aser mazüngi aliba ajanga nija atema mapang mangu,” ta paisa ashi.