Nüburtem nüngdak melenshiba agi ‘Rock On 2’ merepranger:Sidhwani

Mumbai, November 12, 2016 : “Rock On 2” produce asüsang, Ritesh Sidhwani-i, Ato Kilonser Narendra Modi-i sen 500 aser 1,000 senpaktem magitsü ta sangdongba sülen box office nunga timtem alur, ta ashi.
Pai ashiba agi, iba sangdong angashiba sülen nüburtem nüngdak ajungbena melenshiogo.
“Iba temelenshi ajanga tetsükdaktsü aika adokdaktsür. Sorkar nükjidong ajanga aisü nung timtem adoker. Asenoki pei atema kija mebilemtsüla saka tan inyakyim yagi tetsükdaktsü aika adoker kechiba süra küm ana nung film ka yangluteter aser iba film atema joko tanaben maongka mangutsü. Onok joko maongka tanaben mangutsü kechiba süra taruba hoptabo film tanga kar sayatsü,” ta Sidhwani-i IANS dang ashi.
“Rock On 2” film ya Shujaat Saudagar-i direct asü aser film nung Farhan Akhtar, Shraddha Kapoor, Purab Kohli, Arjun Rampal aser Shashank Arora nunger angutsü. Iba film ya Hokolbarnü saya. “Rock On 2” film yanglurtemi shisatetba ama PVR cinema temi convenience fee magir.
Sidhwani-i iba tensa ya Hombarnü nungibo ajungtsü imlar.
“Nai film tajung ka yanglu aser nai reprangnüaka mazüngba agi mereprangtetbaji balaka lir saka ‘Rock On 2’ mereprangtetba yabo ajungbena nüburtem nüngdakba melenshitsüsa akümba ajanga lir aser ibaji kanga tesasatsüka lir,” ta pai shisem.
Sidhwani-i, nisungtemi tang film mereprangnür saka parnok sen tebilemtsü bentetmanür, ta ashi
“Ni PVR aser Inox nungi angazükba agi transaction noklang nung shilem 40 nungi 45 tashi digital inyakyim ajanga tang asür. Tang ama tensa nung nüburtemi film mereprangnütsü,” ta paisa ashi.