Nüburtem sen agizüktsü atema Big Bazaar-i aoer

New Delhi, November 24 (Agencies) : Brihostibarnü nüburtem sen agizüktsü atema Big Bazaar-i ao.
Parnoki, Bank aser ATM tem kima gondha aii nokdakba dang nungibo Big Bazaar nung ani tesüngzükba, ta ashi.
Big Bazaar-i Bodhbarnü metetdaktsüba sülen India kübok yimti 115 nung aliba Big Bazaar aser FBB 258 nung Brihostibarnü nungi tenzüka nüburtemi oa sen agizüker.
Big Bazaar nung point of sale (POS) machine tem ajanga sen agizüktetba maparen ya State Bank of India (SBI)-i yaria tenzükba lir.
“Onok ket nung sen agitsü atema bendanga amenokba card swipe asüba kol ana lir. Nisung shia nem khen ang agizükdaktsür aser iba mapa nüburtemi sen 2000 tashi agizüktettsü. Anepdang tsütsübo khen kanga nungtep ajisüaka anüngdang tashi nungbo nisung ajema aküm,” ta Big Bazzar nung inyaker kati ashi.
Big Bazaar nung customer kati, sen agizüktettsüsa sentong tajung yamai atongtetba ajanga onok anisüngzüker, ta ashi.
“Nisung aii aliba agi ni joko ATM aser bank temi maotsü lemteter liasü. Saka tanübo Big Bazaar nung arua sen mela mela agizükteter. Iba ama inyakyim ya iba mesükba store tulu ajak nung mesangshia tenzüktsüla,” ta Brihostibarnü Big Bazaar-i arur rongnung ka, Sandeep Kaushik-i ashi.
Aji oda süaka HDFC, ICICI aser Punjab National Bank mesükba bank kar indang ATM card tem ajanga iba kol nungi sen magizüktetba agi nübur karbo mepelai meyipa ao.