Nüburtem teimla atalokjang: PM Modi

New Delhi, November 25 (Agencies): Asükwa mongpu Parliament senden tenzüktsü anogo ka lia Bodhbar nü Ato kilonser, Narendra Modi-i opposition party tem dang, par party dang nungi nüburtemi imlaba ataloktsütsü asoshi Parliament senden tangatetba tajung nung kadaktsüner, ta mepishiogo.

Tang linük nung akhümtsübutep mali ta tashishitep onük tulu aliba nung ajemdaker opposition party temi lungkak aita Parliament junga makatettsü südi ta bilema Centre sorkari ayongba party ajak senden nung Ato kilonseri opposition party tem dang iba temepishiba agütsüogo.

Tan senden nung sorkari Goods and Services Tax Bill densema tongtibang Bill aika benoka agizüktsü tebilemba lir aser sorkari, tangatetba tajung nung dang süra Parliament nung onük mashie jembitsü melunga lir, ta shiogo.

Party ajak senden tembangba sülen osangbenertem den jembidang Parliamentary Affairs Minister, M Venkaiah Naidu-i, “Party ajak senden nung Ato kilonser Narendra Modi-i GST Bill ji linük nüburtem taginüba, ta shiogo,” ta ashi.

“GST bill nung terata aliba ajak atema Finance Minister Arun Jaitley-i party ajak den jembitsü,” ta Modi-i jembiba o Naidu-i metetdaktsü.

Bendang linük aika sema senzüba mapang Modi-i foreign investor tem dang 2016 küm GST ji asangsang nung ataloktsü ta jembia aruogo.

Asükwa mongpu senden ya taoba senden ama junga mekatettsü südi ta tang tashi nungbo temaitsü angur.

Congress, Janata Dal-United aser CPM-i linük nung akhümtsübutep maliba onük anema jembitsü aser GST Bill densema sorkar mapatongtem anema noktaktsü tebilemba metetdaktsüogo.

Ano Bodhbar aonung tesü party ajak senden ka amentsü Lok Sabha Speaker, Sumitra Mahajan-i ayonga lir.