Nüburtem timtembaji amajok masütsü: PM Modi

New Delhi, November 20 (Agencies): Deobarnü Ato kilonser, Narendra Modi-i, sen 500 aser 1000 anentsüba ajanga nüburtemi timtem ajangshibaji amajokbo masütsü, November 8 aser December 30 tsüngda- anogo 50 sülenbo ajak süngjemtsü, ta metetdaktsü.
Tanü Uttar Pradesh, Agra nung sensakertem ki asütsü atema scheme, Pradhan Mantri Awas Yojana tenzüktsüba sülen lokti den jembidang Modi-i, “Iba telemtetba ya ajak timtemdaktsütsü atema agiba masü. Iba telemtetba ya asen tarutsü lanurtem kümzüktsü atema agi,” ta ashi.
“Sen tamshidak anentsübaji sensakertemi pelaa agizüktetogo. Timtem aika ajuruaka parnoki onok nungitogo,” ta paisa ashi.
Ato kilonseri ashiba agi, sensaker aser middle-class nüburtembo ochishirtem lir aser parnok ket nung black money mali, anungji sorkari parnok yaritsü.
Paisa, nisung aikati sen anentsüba ya junga mangateter aser ano aika (ochimashi sen rizünga alirtem) iba telemtetba ajanga aoksaogo, ta ashi
Iba telemtetba agiba ajangasa sen taila amshiba nung densema alirtem aser temesepba mozü shibelenertem kongshiogo, ta Ato kilonseri ashi.
West Bengal Chief Minister, Mamata Banerjee aitsüba olen ka nung Modi-i, “Sen crore aika nung ochimashi ken o nung dena alir yimtenren lenirtem iba telemtetba yagi kongshiba ajanga parnoki ni aitsür,” ta ashi.
Pai Congress-a aija, tesüiba küm 70 tsüngda sorkar balalai black money atema ola madok, kechiyong parnoki tashi mangutsü ta shisabulua bilem, ta ashi.
“Shirnokisa ni anema ola adoker’ar meteta lir ma? Chit fund business nung shiba indang sen invest asü’ar linüki meteta lir ma? Sensaker lakh aser crore aiakti chit funds nung sen inoktsü. Ajisüaka yimtenren lenirtem temoatsü ajanga sen crore aika samadok,” ta Ato kilonseri ashi.
Maneni Mamata aitsüba olen ka nung Modi-i, “Chit fund nung takoksa anguba ajanga kibong nung tebuti noklang aika soseta asütsüsa akum. Putiotsüji reprangdangang, aser tangbo parnoki kü dang tasüngdangba akar,” ta ashi.