Nüburtemi Aamir manemtsüla: Farah Khan

Mumbai, November 26 (Agencies): Nüburtemi nungtugu Bollywood actor, Aamir Khan manemtsü tayongzükba olen ka choreographer & film yanglur, Farah Khan-i metetdaktsüogo.

India nung nüburtemi tamangba yimsü, kin kidong aser iba amala ken o balala nung aremzüka lenji otepa malir ta Aamir-i tawa sangoktsüba sülen nüburtemi iba olenji magizükteti Aamir anemtsü tenzüka lir.

“Nübur aikati Aamir-i sangoktsüba o magizükteti pa anemtsü tenzüka lir. Ajisüaka, nüburtemi pa anemba ajanga parnok rong nunga taremzük aser lenji aotsü tangatetba mali ta jungkai adokdaktsür,” ta Farah-i metetdaktsü.

“Aamir kinüngtsü, Kiran küna taküm tepiyong India nung lia aruogo. Ajisüaka, nüburtemi arishitsü tenzükba sülen lar kibong India nung joko sünepa melitettsüsa tang jenjang bener aruja lir,” ta laisa shisem.

Ano, nüburtem rong nung aremzüktepa lenji oa alitsü tangatetba maliba ken o nung tashitemet nisungtemi parnok nem agütsüba sempet meyipja par mepelabaren metetdaktsüba maparena pusemba olen ka arishi küm 50 tain Aamir-i metetdaktsüogo.